Gas sem dan

Food, Civil Supplies & Consumer Affairs (FCSCA) secretary kaihhruaiin tun hnai khan Mizorama eirawngbawlna gas leh tuialhthei sem dan sawiho a ni. Khua/veng tina gas distribution point-ah gas cylinder bûk vek turin an rel a, bûk tling lo chu distributor-te'n an la let leh ang a, company-ah an thawn lêt tur a ni. An thawn letna lehkha copy FCSCA department-ah an pe ang a, bûk tling lo chu customer-te hnenah sem theih a ni lo ang.

Mizoramah hian hun rei tak chhung chu danin a phut angin eirawngbawlna gas hi sem a ni lo a, chhan hrang hrang a awm thei ang. Mipuiin kan tih tur kan tih loh vang a awm rualin a distributor lamin an tih tur an tih ṭhat tawk loh vang a tam zawk hmel a, a viltu sorkar lam pawhin an tih tur an tiṭha tawk lo tih an inpawm awm e.

Tun hnaiah gas bur khawih chingpen man chhuah a ni a, sorkar lam ṭan la tura nawrna a nasa a, sorkar pawhin mipui nawrna hi ngawih bosan loin ruahmanna thar a siam a, a lawmawm khawp mai. Tun hnaia an rel anga an kal thei a nih chuan mipuiin gas thila buaina an tawh tam tak hi chu sut kian theih a nih a beiseiawm.

Gas bûk tling lo hi min tibuaitu ber chu a ni a, hei hi tihtawp theih a ṭha hle. Tun hnaiah CYMA-te hmalaknain gas khawih chingpenna hmun hmuh chhuah a ni a, tunah sorkar lamin gas buk tling lo sem lo turin distributor-te thu a pe zui a, mipui tan chuan chanchin lawmawm tak a tling. Heti a nih chuan gas khawih chingpen tuar theitu hi mipui lam ni loin a distributor-te an ni tawh dawn a, an gas bur phurtu lirthei lam an vil ngun a ngai dawn a ni.

Hetihlai hian mipuite bawk hian sorkar dan zam thar hi kan ngaih pawimawh a ngai a, gas bur hi buk tling lo tih hre reng chunga la duh tho kan awm ṭhin ang tih a hlauhawm. Danin a phut angin a buk tling leh tling lo hi endik a ni zel tawh dawn a, mipuiin gas buk tling an dawng ziah thei dawn niin a lang a, he rawtna hi a takin kalpui ngei rawh se.