Remna Ni

Remna Ni champhaphak vawi 30-na chu Mizoram hmun hrang hrangah lawm a ni a, a lawmna pui ber Aizawl Lammualah Mizoram Larsap hoa hman a ni a, political party hrang hrang aiawhte'n thu an sawi.

Kum 1966-ah ram a buai a, kum 1986-ah remna siam a ni. Remna a thlen khan Mizo mipui zawng zawng an lawm a, kohhran hrang hrang an hlim a, political party thlei bikna awm loin he hun hi lawm a ni.

Hun a kal zel a, June 30, Remna Ni hi kum tin lawm a ni chho ta a, a phu ang ngeiin state chawlhah puan a ni bawk. A lawm dan pawh a dang chho zel a, eng emaw hunlai aṭang khan political party lamin a hranga hmangin he ni hi mahni insawimawina niah an hmang a, midangte sawichhiatna remchangah an hmang ta bawk.

Political party lamin he ni hi inrem lohna tuhna ni-ah an hmang titih ta a, hei vang hian Central YMA chuan ban pharin Mizo zawng zawngin hun hlimawm tak an hman theih dan ruahmanna a siam ta a ni.

Remna Ni hi Mizo-te tana ni lawm-awm danglam bik a ni a, remna a awm loh avangin mi tam takin nun an chan a, chhungkaw tam takin an tuar a, Mizoramin hun harsa tak a pal-tlang. Tunah chuan remna a lo awm ta a, a thlentirtu bera ṭan tuma thu inchuh hi bansan ila, remna hnuaiah hmasawn tumin thawk ila, Remna Ni hi inunauna, inpumkhatna ni-ah i hmang chhun-zawm zel ang u.