Sorkar hna ruak hnawhkhah

Land Revenue & Settlement Minister tarlan danin, LRD department-ah post ruak 46.95% a awm a, surveyor bikah post ruak 55.47% a awm. Ram chungchang chinfel ngai la chinfel loh tlingkhawm (pending case) 13,908 a awm bawk.

Revenue department hian ram chinfel ngai tam lutuk chingfel turin theihtawp an chhuah ngeiin a rinawm a, hun bithliah intukin, kum 2021 chin hma lama mite chu June 2024 chhunga tihfel vek turin ruahmannate pawh an siama sawi a ni.

Pending case-te hi mi tam tak mamawh ngawih ngawih, chinfel hun an nghahhlelh em emte a ni hlawm ang; a chak thei ang bera chinfel ni se a duhawm. Chingfel turin ruahmanna ṭha zawk, tih dan ṭha zawk neih a ngai niin a lang a; hotute leh thawktute'n uluk zawka an ngaihtuaha hma an lâk a ngai a ni.

LRS department pumpuiah post ruak 46.95% a awm a, surveyor phei chu post awm zat zatve aia tam post ruak 55.47% a awm. Thawktu an indaih lo hle ang tih a chiang a, thawktu lak belh kawngah sorkarin thawihpatawpa inpawt fán chunga ṭan a lak a, mamawhna takah zel thawktu a tam thei ang ber lak a ngai awm e.

Sorkar department dangahte pawh post awm si, hnawhkhah lo tam tak a awm a, thawktu indaih lo tak tak an ni hlawm. Department tin hi an pawimawh vek a, thawktute pawh a hotu lam an pawimawh ang bawkin a hniam lamte pawh pawimawh tak tak an ni.

Sorkar department hrang hranga thawktu indaih lohna chingfel tura ṭan lak a ngai. Group A officer - MCS, MPS, MIS, MFAS, etc. kum tin lak a ni ṭhin hi a lawmawm a, tih bik lutuk erawh a ṭha ber lo thei. Grade hniam zawka thawk turte pawh awmze nei taka lâk chhoh a ṭul ang.

Post ruak ṭhenkhat chu mamawh lutuk loh leh a awm loh pawha sorkar/department hna ṭha taka kal thei thote pawh a ni ang. Post ruak zawng zawng hi hnawhkhah a ṭul kher lo ang a, pawimawh bikte erawh chu ngaihthah loh a ṭha e.