Taxi chuan man

State Transport Authority (STA) chuan March 1, 2015-a hman ṭan turin taxi chuan man a bituk thar. Aizawla taxi stand-a sorkarin a pawm stand 45 inkarah km. 1-ah Rs. 40 zel a ni a, km. 1 aia a thui chuan km. 1 zelah Rs. 30-in a pung ang a, zan dar 9 aṭanga zing dar 4 inkarah 25%-in taxi chuan man hi a sang ang.

Aizawla taxi chuan man sang hi mipuiin an sawisel ṭhin a, thuneitu lam­in an bituk aia sang an lak ṭhin vang a ni. Tunah STA lamin taxi fare thar an tichhuak ta a, hei hi taxi chuan man awm sa aiin a sang a, chutihlaiin taxi driver ṭhenkhatin chuan man an lak ṭhin aia hniamte pawh a awm thung.

Tunah chuan sorkarin ṭan chhan mumal tak neiin taxi fare a siam ta a, hei hi ṭha taka zawm turin taxi neitu lam beisei ila, mipui phur erawh a rih belh sawt dawn niin a lang. Taxi chuan man bithliah hi thil harsa tak a ni a, kawng chhuk chho leh kilkhawr tak taka tlan a ṭul changte a awm avangin inang diak diaka bithliah theih a ni lo. Chuti chung chuan awmze nei zawk leh mumal deuha taxi fare neih hi a hun tawh hle a ni.

STA lam hian Mizoram Consumers Union, Mizoram Taxi Owners Association leh Mizoram Taxi Drivers Association rawtna thlir chungin taxi chuan man hi an bithliah thar niin an sawi a; mi zawng zawng tihlawm kim theih ni lo mah se, a tute tan pawha pawm nuam tawk thil a awm a, chu chu STA lamin an thlir pawh hi a nih hmel.

Tunah chuan mipuiin taxi fare thar an la hman ṭan loh avangin eng ang taka hautak nge tih an la hre lo a, a hmaa an hman ṭhin aiin a tlawm zawkna mualte pawh a awm ve mai thei. Dan mumal tak neih a, taxi driver-te'n an duh zat zat an chhiar ang ringawt lo deuha kal hi a hun tawh a, a pawimawh ber chu 'mipui tan phurrit a ni em?' tih hi a ni a, mipuiin a taka an hman ṭan hunah an la hria ang chu.