Bandh neih chhan

MNF chuan tun hnaiah Mizoram pumah total bandh an buatsaih a, total bandh an neih chhan hi sorkarin mipuite phurrit siama thil man hrang hrang a tihto vang leh chhiah a tihpun duh loh lantirna a ni.

Total bandh neih hrim hrim hian nghawng lian tak a neih avangin pumpelh theih a ṭha ber a, chutihlaiin politics-a eptu pawl lam chuan sorkar thiltih dan hi a lutuka hriain total bandh neihna thamah an ngai a ni. Politics thil a nih tawh hi chuan lai taka thil thlir hi a harsa a, total bandh huaihawtna chhan tlingah an ngai a, sokar thil tihte an dem a ni.

Sorkar hian tun hnaiah leiman leh Zoram chhiah a tipung a, buhfai man a tisang a, tui leh kawlphetha hman man a tihsan bakah thisen sawngbawlna man a la thar bawk. Heng thilte hi tawngpawng dodal ngawt tur chu a ni lo mai thei a; nimahsela mipui dinhmun thlira vawi lehkhata mipui pawisa hekna tur thil a thleng tam lutuk hi chu ngaihtuah nawn a ṭha khawp mai.

Mizote hian chhiah kan pek tam loh avangin chhiah pek hi kan hrethiam hleithei lo a, kan do ngawt zel a, chhiah pek hrim hrim hi chu do tur a ni lo. Chutihlaiin mipui tana phurrit tling tham loa chhiah leh thil dang man tihsan theih ni se a ṭha hle mai a, vawi leh khata mipuiin sorkara an chhûn luh tur chi a pung ta vak mai hian mipui a tibuai a, mi tam tak tan harsatna a thlen niin a ngaih theih.

Sorkar pawhin eptu lam tih a nih vangin hre lo der kher lo se, mipui mar dek chungin eng chinah nge mipuite chhawk zangkhai theih an nih tih thlir reng se a ṭha khawp mai.