Huaisen takin zirtirtu sem rual ni se

Champhai MZP chuan Champhai College-ah zirtirtu dah belh phûtin August 5, 2024 aṭangin Champhaia sorkar pisa leh zirna-in zawng zawng an dang.

Chutih laiin, Higher & Technical Education Minister chuan, Champhai College chu Mizoram sorkar college zingah zirtirtu post awm zat aṭanga chhûtin zirtirtu ngah ber dawttu a nih thu a sawi. Sanction post 44 a awm laiin, zirtirtu 61 an awm mek thu leh, zirtirtute chu regular teacher 27, contract assistant professor 7, RUSA assistant professor 4, part time assistant professor 10 leh casual teaching faculty 13 an nih thu a tarlang.

Champhai MZP-te'n Champhai College-ah zirtirtu dah belh an phût hi anmahni thlirna aṭang chuan thil àwm tak a ni ang a, Champhai khua leh zirna an ngaih pawimawh vang a ni ang. Zirtirtua sanction post awm zat leh zirtirtu awm mek zat Minister-in a sawi ngaihtuahin, Champhai MZP thil phût a âwm loah ngaih theih a ni bawk.

Champhai College hi zirtirtu ngah ber dawttu an ni tih a ni a; college dang 20 vel chuan Champhai College aiin zirtirtu an ngah lo zawk a, zirtirtu an indaih lo zawkin a rinawm. Indaih loa inhriatnaah lungawi lohna lantir zel tur ni ta se, Champhai MZP ai maha lungawi lo nasa tur leh lungawi lohna lantir nasa tur an tam àwm e.

Zirtirtu sanction post 44 a awm laia zirtirtu 61 an awm chunga zirtirtu an indaih lo a nih chuan college zirtirtute sîksâwi a, siam rem a ngai hle tihna a ni. Department-a zirtirtu awm zat azirin dah belh ngai a awm theih rualin, lak chhuah ṭhen ngai an awm a rinawm a; tuna lungawi lohna lantir mek Champhaiah pawh hian zirtirtu eng emaw zat chu lâk chhuah ṭhen a ngai zawk mai thei.

College zirtirtu siam rem tur hian huaisen a ngai hle dawn a, sorkar hian college duhsak bik nei loin hma la se. College zawng zawngte zirlai neih zat leh zirtirtu awm zat bakah, department-te dinhmun thlir chungin, Mizoram college-a zirna a kal tluan theihna ber turin huaisen takin zirtirtu a sem rual a ṭul a ni.