Mizo hmeichhiate

Mizo Hmeichhia Insuih­khawm Pawl (MHIP) chuan tun hnai khan MHIP kum 40-na, Ruby Jubilee an lawm. He huna khuallian chief minister Lal Thanhawla chuan, Aizawl Municipal Council leh village council-ahte hmeichhiate tan seat hauhsak a ni tawh tih sawiin, chungte chu lawm taka pawm turin MHIP-te a ngen.

MHIP-in kum 40 a lo tling ta a, MHIP din tirha Mizo hmeichhe dinhmun leh tuna an dinhmun chu a inthlau tawh hle ang. MHIP-te hian harsatna leh dodalna karah Mizo hmeichhiate dinhmun chawi kan tumin theihtawp an chhuah a, tun­ah chuan Mizo hmei­chhiate pawh dinhmun ṭha zawkah an ding tawh a, mi­pate nen an dinhmun a danglam tam tawh lo hle a ni.

Mizo hmeichhe dinhmun hrim hrim hi tun hnaiah chuan a ṭha thawkhat hle a, mipate tih theih an tih theih loh hi a tam tawh lo. Kohhran ṭhenkhatah puithiam hna an la chelh thei lo tih mai loh chu mipate nen an danglamna sawi tur a tam tawh lo a, tunah phei chuan politics lamah an hamṭhatna tur kawng tam tak sorkarin a ruahmansak.

India ramah kan cheng a, India ramah hian hmeichhe president leh hmeichhe prime minister hial pawh kan nei tawh a, state tam takah chuan hmeichhe chief minister pawh an nei. Hmeichhe tana a bika seat hauhsak ngai lem loin hmeichhe zingah hruaitu ropui tak tak an awm ṭhin a, Mizo hmeichhe zingah ram pum huap hruaitu lian kan la nei meuh lo hi ram inrelbawlna zir loh vang nge ni a, a hmeichhe lam zir loh vang, tihte pawh ngun taka ngaihtuah tham chu a ni awm e.

Tunah chuan village council leh Aizawl Municipal Council inthlanah hmeichhe tan a bika seat hauhte a awm ta a, loh theih loha hmeichhia thlan tlin an ni zel tawh dawn tih a chiang. Heng mite hi seat hauh awm lohna MLA leh MP thleng pawhin nakinah chuan an la tling chho zel lo ang tih a sawi theih loh a, hmeichhiate tan ram rorelna lamah pawh kawng a inhawng zau zel dawn a ni.

Hmeichhe dinhmun chawi san tum luata mipa er leh sawisel zawnga thil kalpui hun a liam tawh a, Mizo hmeichhiate pawhin state danga hmeichhiate elin ṭan an la ṭan tawh ang a, Mizo hmeichhe ropui tak tak hi an la chhuah belh zel ngei ang.