Nursing college/school-te an hlu

Aizawlah nursing college thar, Aizawl College of Nursing (ACON) hawn thar a ni a, tun August thla tìr aṭangin zirna an ṭan a, B.Sc. Nursing zirna a ni. ACON hi private college a ni a, Mizorama nursing college palina niin a lang a, nursing college dang - sorkar enkawl RIPANS leh MCON bakah, BN College of Nursing (private)-te a awm tawh.

Nursing college bakah hian General Nursing & Midwifery (GNM) leh Auxiliary Nursing & Midwifery (ANM) zirna nursing school Mizoramah a awm nual a, sorkar enkawl leh mimal enkawl a inzat thuak âwm e.

Mizoramin zirna lamah hma a sawn zel a, course a pung tial tial a, zir theih chi hrang hrang a awm belh zel a; thil lawmawm a ni. Medical lam chauh ni lo, thil dangah pawh course dang zirna hawn belh zel theih ni se a ṭha a, ṭhalaite eizawnna lama kawng inhawn belh zelna a ni a, Mizo zirlaite leh ṭhalaite tan leh ram leh hnam tan a ṭha hle ang.

Mizoramin state páwn lama thawn chhuah tur leh thawn chhuah tham thei leh thlai thar emaw, thil siam chhuah emaw kan nei mang lo a; mihring thiamna leh theihna thawn chhuah hi theihna kan neihna remchang tak a ni.

Mizoram mipui kan pung zel a, state chhungah eizawnna pung ve zel bawk mah se, Mizoram chhungah chauh chuan indaih theih a ni dawn lo. Chuvang chuan, mi eng emaw zat chu eizawng turin state páwnah an chhuah a ngai a, chumi tur chuan thiamna eng emaw tak neih a ngai.

State páwna thawk thei tura Mizo ṭhalaite'n thiamna leh theihna an neih theihna remchang ber pakhat chu mihring/damlo enkawl (nursing) hi a ni. Nursing zir duh tam tak an awm a, chu'ng mite inzirna tura nursing college/school a awm belh zel hi a ṭha hle. Mizo ṭhalaite tan ṭangkai a, an hlu em em a ni.

Nursing school/college-te hi an ṭan a ngai a, inelna thianghlim neiin, hmun dang aia zirna hmun ṭha zawk nih tumin ṭang vek se a duhawm. Zirna-in satliah ni lo tur leh zirna hmun ṭha bik nih tumin theihtawp chhuah se, ram leh hnam tan an hlu hle dawn a ni.