Lunglei-Tlabung kawng siam muang

Lunglei Hrangchalkawn leh Tlabung inkar NH-302 kawngpui zauh leh siam mek chu kum thum chhungin hna thawh tur awm zawng zawng zinga 38% vel chiah thawh zawh a ni.

Ruahman ang chuan, Lunglei-Tlabung kawng hi kum khat leh a chanve vel chhunga siam zawh tur ni mah se, kum thum chhungin siam zawh a ni lo mai ni loin, tun thlengin Package A-ah 38.20% leh Package B-ah 37.65% chauh thawh zawh a ni.

National Highway enkawltu NHIDCL hnuaia kawng siamtu BRN Infrastructures-in Lunglei-Tlabung kawng hi an siam muang tak zet. An beisei anga thawh chak theih loh chhan tur harsatna neuh neuh an nei ngeiin a rinawm a, chuti chunga kum 3 chhunga kawng siam tur hmun thuma ṭhena hmun khat erh awrh chauh an la siam hi chu a zialo tak zet a ni. A hnam anga inngaih pawimawh lohnaah ngai an awm a nih pawhin a àwm lo lêm lo ang.

Lunglei-Tlabung kawng siam hi hna thawktute'n an thawh muan em avangin kawngpuiin a paltlang khuate'n harsatna lian tak an lo tâwk fo tawh a, lirthei kal hleih theih loh khawpin hun rei tak rak a awm tawh ṭhin a; lungawi lohna pawh an lo lantir fo tawh.

Sorkar hotu lam pawhin hma an la a, an lo nawr tawh ṭhin. Chuti chung chuan an thawk chak hlei thei chuang lo hi a mak viau. Kawng siamtute hian huaisar riau chhan ṭha tak, sorkar hotute hlauh loh riau chhante an nei a ni ang a, tia ngaihtuah theih a ni hial.

Kawng siam zawh hun pawhsei tawh pawh thleng turin thla 5 emaw chauh a awm tawh a, tunah 38% chauh an la siam avangin a hunah an zo hman dawn lo tih a chiang. Hun tiamah zo hman dawn lo mah se, a rang thei ang bera an siam zawh theih nan sorkara thuneitute'n Lunglei-Tlabung kawng siam hi ngun lehzuala an vil a ngai a, a theih ang angin na zawka an nawr a ṭul a ni.