Thilpek pek

June 30 kha Mizoramah Remna Ni a ni a, he ni denchhen hian pawl hrang hrangin midangte tan ṭanpuina an pe.

Mizote hi midangte ṭanpui ṭhin kan ni a, chhiatni ṭhatnia kan inpuih tawn piah lamah hian mi harsa leh chhumchhiate
ṭanpui ṭhin hnam kan ni. Khawvel ṭhang zelah inpuih tawn dan pawh a danglam chho hret hret a, mi hausa leh neinung zawkin a harsa zawkte hnena tangka sum leh thil danga inpuihte kan intihhmuh chho zel a, thil lawmawm tak a ni.

Hnam dangte hian ni bik denchhena thilpek pek hi an ching a, hei hi Mizote pawhin kan entawn chho zel a, hmasawnna ṭha tak, chhunzawm zel chi a ni. Kristian sakhaw zuitu kan nih angin Krismas laia midangte hnena thilpek hi kan uar a, mimal, pawl leh kohhranin thilpek kan pe a, kan uar deuh deuh zel niin a lang.

Mizote tana ni pawimawh bik ṭhenkhatah pawh thilpek pek kan ching chho zel a, hei hi kan intihhmuh zel a ṭha khawp mai. Sakhaw ni bikah chauh lo pawh, Mizote tana ni pawimawh ṭhenkhata midangte ṭanpui hi chin ṭhana kan neih chhoh chuan, chhuan lo la awm zel turten tun aia nasain heng nite hi midangte ṭanpuina ni, midangte hnena thilpek inpek a remchan ni-ah an la hmang zel thei awm e.

Mizo zingah pawh rethei leh hausa kar a zar zel lo thei lo a, khawpuia mi neinung zawkin thingtlanga zin chhuaka thilpek pekte kan intihhmuh zel a, hei hi a pawimawh khawp mai. Kan Mizopui ngei zingah pawh keini aia nei lo leh harsa zawk hi an awm zel a, midangte tana thilpek pek hi i uar chho zel ang u.