Entawntlak Doctor

July 1 kha Doctors' Day a ni a, Mizoramah Indian Medical Association (IMA), Mizoram State Branch huaihawtin lawm a ni. Aizawlah hrisel nan kea kal tam a ṭha tih mipuiin an hriat theih nan Walkathon an buatsaih a, doctor 86 an tel.

Mizoramah hriselna ngaih pawimawh nachang kan hre tawk lo a, hnam hrisel lo tak kan ni mek. Ram pum huap pawhin natna ṭhenkhatah chuan a hluarna ber kan ni hial a, mipui nawlpui hian hriselna hi kan dah pawimawh tawk lo.

Kan nun dan (lifestyle) ṭhenkhat hi a hrisel lo a, kan ei leh inah kan fimkhur tawk lo a, zuk leh hmuam kan tinasa bawk nen, Mizorama mipui cheng kan tlem aiin hriselna kawngah kan dinhmun a chhe hle a ni. Tun ang zela kan kal a, insum ṭulnaa kan insum loh a, hrisel tura tihngaite kan ngaihthah chuan kan ram hmalam hun hi a eng lo hle a ni.

Hetihlai hian hriselna pawi-mawhzia hria a, a awmzia hre chiang ber tura ngaih kan doctor leh damdawi lam thiamte zingah meuh pawh hian hriselna ngai pawimawh lo a, nun dan (lifestyle) hrisel lo taka nung tlat hi mi tam tak an awm a, anni tal hian midang tihhmuh turin an nun hi vawng uluk thei se a ṭha ngawt mai.

Mihring pianpui leh hriat loh vanga kan kai natna hi a awm ngei a, chutih rualin kan awm danin azir loh vanga natna kan kai hi a awm bawk. Hengte hi chu damdawi lam chinchang hre deuhte hi chu inthiarfihlim thei se, chu chu midang-te tan entawn tur ṭha tak a ni ang.

Doctor-te berin kea kal pawimawhzia a taka lantirin mipui an zirtir hi a lawmawm a, hei hi an ni bik denchhena ti ni loin a takin nunpui zui se a ṭha khawp mai. Hriselna kawnga kan la hniam avang hian entawn turin doctor-te hian ke pen hmasa ngham se, mipui hi chuan entawn tur ṭha an hmuh chuan an entawn maiin a rinawm tlat a ni.