Khaw entawntlak

Lengpui khaw mipuite nimina kal-khawm chuan, an khua chu poly-thene hman lohna leh awm lohna khua a nih theih nan hmalak an rêl.

Lengpui VC/VEC leh Tlang-nuam BDO office lamin thingtlang tihhmasawnna tur scheme hrang hrang zir chianna, 'Gram Sabha cum Awareness Cam-paign on various Rural Development Scheme' an buatsaih a; Lengpui mipui kalkhawm chuan, polythene hman lohna leh awm loh-na khua ni tura hma la turin thutlukna an siam ta a, "Lengpui khaw mipuite'n an thlah kal leh zel turte tana chenna tlak khawvel an siam theih nan leh khawpui thiang-hlim leh fai a nih theih nan bawlhhlawh paih danah, bawlhhlawh ṭawih thei leh ṭawih thei lo thliar hrang zel tura hma la ṭan turin leh, polythene-in a tihbuai loh khua a nih theihna tura polythene hman lohna leh awm lohna khua ni tura hma la ṭan turin thutlukna siam a ni," an ti.

Sorkar laipui aṭang leh state sorkar aṭangin thingtlang mipuite chawikanna tur ruahmanna hrang hrang a awm a, khaw ṭhenkhatah ngaih pawimawh hlawh lo mah se khaw fing deuhte chuan a ṭangkai thei ang bera chhawr an tum ṭhin. Kan thingtlang khaw tam takah hi chuan heng sorkar ruahmannate hi a taka kalpui hleitheih pawh a ni lo a, a sorkar lam thawktute zir loh vangte leh a khuain an zir loh vangte pawh a ni thei ang.

Hetihlai hian khaw fing leh a ngaihna hria, khaw bengvar hi chuan faina kawngahte, an khaw ram leh lui hum-halh kawngahte, hri-selna inzirtirna kawng-ah te, zu leh ruih-hlo tihrem tuma ṭanlak danahte leh kawng hrang hrangin a bik nih an tum ṭhin. Khaw dangte aia thlai thar tam leh enkawl thiam bikte pawh an awm a, khaw remhria leh a ngaihna hre bik hi an awm ṭhin.

Lengpui inhuamna hi a lawm-awmin an entawntlak a, hetiang tihduhna rilru an nei hi an chhuan-awm hle. Mizorama khaw hrang hrangte hian a bik nih tumna leh a ber nih tumna hi nei thei tlang ila, a ṭha zawnga khaw dangte entawn tlaka awm thiam i zir ang u.