Mipui Aw leh mipui vuivaina

Mizoram sorkar chuan sorkar leh department-a lungawi lohna neite'n an vuivainate sorkara an thlen theihna tur 'Mipui Aw' website a siam a, a duh apiangin online-in an lungawi lohna leh vuivainate an thlen thei. Department/office ṭhenkhatah zualkona tur báwm, 'Complaint Box' dah a ni bawk.

'Mipui Aw' website-ah hian August 8, 2024 thleng khan zualkona (grievance) 212 a lut tawh a, chu'ng zinga 177 chu chinfel a ni tawh. Zualkona dawng tam ber Land Revenue and Settlement department-in grievance 19 an dawng tawh a ni.

Mipuiin minister leh MLA te, sorkar department-te kan mamawhna avangin kan dâwr ṭhin a; chu'nga chuan kan duh angin thil a kal lo fo a, kan lungawi lo ṭhin. Mipui kan lungawi lo ṭhin hian chhan a nei a; mipui lam thiam loh a awm theih rualin, tam tak chu kalphung fuh tâwk loh vang te, thawktute inthlahdah vangte a ni fo. Thuneitu sang zawka zualkona àwm tak takte a awm ṭhin.

Tun hma aṭanga tunlai thlengin sorkar leh department hrang hrang laka lungawi lohna a awm fo a, mipui phun thâwm a rin zual chángte pawh a awm. Mipui kan phun a, kan insawh a, tih vak theih kan nei si lo a; mipui kan khawngaihthlak cháng a awm fo.

Tunah chuan Mizoram sorkarin mipuiin an lungawi lohnate an thlenna tur remchang a siam ta a, a lawmawm. 'Mipui Aw' siam a nih aṭanga tun thlenga vuivaina lut tawh zat 212 hi a tam tia sawi theih a nih rualin, mipuiin sorkar leh department kan sawisel nasat ṭhinzia ngaihtuahin a tam loah a ngaih theih.

Mi tam tak chu an phun a, an insawh a, chutah chuan an duhtâwk fo. Ṭawngkaa phun leh sawiselah duhtâwk mai lo a, kan dikna leh chanvo kan chan ngei theih nan thuneitu sang zawka vuivaina kan thlen theihna remchang 'Mipui Aw' hi tun aiin hmang ṭangkai lehzual thei ila a ṭha; chu chu sorkarin 'Mipui Aw' a siam chhan pawh a ni.