Mizoram MP-te iner loin inel se

Mizoram MP pahnihte chu August 9, 2024 khan Parliament session-ah thâwm an nei veve. Lok Sabha MP chuan house-ah thu sawiin, Mizorama vawk vulhtu, African Swine Fever vanga harsatna tâwkte zangnadawmna pe thuai turin sorkar laipui a ngen a; Rajya Sabha MP-in zawhna a neih chu DoNER Minister-in a chháng bawk.

Mizoramin MP pahnih - Rajya Sabha leh Lok Sabha-ah pakhat ve ve chauh kan nei thei tih kan hria a. Mizoram MP neih zawng zawngte'n ni khat thil thua an ṭhutna house ve vea thâwm an neih ve ve thil thleng khát tak leh thleng tam lo tak a ni âwm e. Thâwm an nei chho dun hi a lawmawm a, Mizo mipui kan lawm tlang ngeiin a rinawm.

Mizoram hian MP eng emaw zat kan lo nei ve tawh a, mahse, Parliament House-a kan MP neih tawhte thâwm hriat tur a awm lo ṭhin viau; 'MP ngáwi reng' tih ṭawngkam pawh a lâr ṭhin rêng a ni.

Kan MP-te'n Parliament-a thâwm an nei lo lutuk leh session-a thu an sawi ve ngai lo lutuk ṭhin kha MP ṭhenkhat leh anmahni ṭantute chuan phatmarna an zawng ṭhin. Chhuanlam langsar tak chu Parliament session-a thusawi harsatzia a ni.

Parliament in hnihah MP pakhat ve ve chauh nei ni mah ila, tum tak tak chuan thu sawina hun an chan theihzia tunah chuan kan hmu ta. Tuna kan MP pahnihte ṭhahnemngaihna vang te, ram leh mipui tana thil tih tak tak an duh vang te, an tumruh vangte a nih a rinawm a; an fakawm.

Rajya Sabha MP phei chu Parliament House-ah a thâwm a ná a, Mizoram tan ṭhahnem a ngai hle tih a lang. Rajya Sabha MP chêt dan hi Lok Sabha MP thar pawhin a ûm chhoh ve a ngai dawn a, ṭhahnemngai taka thâ thlah loa a beih chhoh a ngai ang.

Mizoram MP-te hi party hrang ni mah se, iner loin inel se, thawh dun theihna laiah chuan lungrual takin thawk dûn zel thei se, ram leh hnam tan hmasawnna leh hlâwkna a ni ang. Mizoram mipuiin anmahni kan beiseina pawh a sang zel dawn a, ṭang sauh sauh zel se; nakin zela MP la ni turte tan entawn tur ṭha hnutchhiah tum tlat chungin han ṭang mar zel teh se.