Ramri buai chingfel tura ṭan lak

Mizoram leh Assam sorkar aiawhte chu ramri buai chinfel tumin ṭum riat an inbe tawh. Inbiak hmasak ber chu kum 20 chuang kal ta, February 15, 1994 khan a ni a, inbiak hnuhnung ber chu August 9, 2024 khan a ni.

Ramri buai chinfel tuma inbiak tawh ṭum riat zinga ṭum li-ah minister ve vete inbiain, political level-a inbiakna a ni a, ṭum li dang chu government official-te inbiakna a ni thung. March 31, 2025 hmain political level-a inbiak leh tum a ni a, chumi hma chuan official level-a inbiak hmasak tum a ni bawk.

Ramri buai chinfel tuma state pahnihte'n hma an la ṭhin hi a lawmawm. Ramri buai chinfel mai theih a ni lo a nih pawhin, inbiak tam a, inkawm tam a, thil sawiho tam nâk nâk chuan inkungkaihna leh inpawhna ṭha a awm ṭhin. Engtikah emaw chuan rah duhawm tak chhuahin, ramri buai chinfel a la ni ngei pawh kan beisei zel tur a ni ang.

Mizoram leh Assam-in tuna ramri china an pawm ve ve ang hi chuan state pahnihte hi ramri-ah hian an inrem thei kher lo mai thei. Mahni ram china pawm chin zawng zawng hloh leh chân tum miah lo ve vea indâwr a nih chuan inrem a harsa hle ang; ramri buai pawh chinfel theih a ni loin a rinawm.

Ramri buai chingfela inrem tur chuan state pahnihte'n khawi lai emaw hloh leh hlêp chin an neih a ngai âwm e. Inrem tur chuan khawi lai hmun emaw hloh a, khawi hmun emaw neih belh ve thung a ngai dawnin a lang a; hei hi kan ram hruaitute'n an hre chiangin a rinawm a, mipui pawhin kan hriatthiam ve a ngai ang.

Inrem loh te, innghirngho reng maite hi a nuam lo a, a ṭha lo bawk a, hmasawn pawh a har ṭhin. Mizoram leh Assam ramri chinfel a nih theih nan Mizoram sorkar hotute hian theihtawp chhuah zel se, rilru inhawng leh rilru zau tak pu chungin, Mizoram leh Mizo mipui tana ṭha ber tur ngun taka ngaihtuah chungin hma la zel se.

Mipui pawh ramri chinfelna leh inremna tura hmalaknate tibuai thei zawnga che loin, inremna tura hmalaknate tichak zâwngin rilru kan pu tur a ni ang.