Police, discipline leh fitness

Mizoram Police Sports Meet kharna inkhawma khuallian, Home minister R Lalzirliana chuan, Congress-in sorkarna a siam hnuah Mizoram police-te chu mipuite'n an ring ngam leh ṭan niin a sawi a; police zingah inthununna thlahdah vanga dul kiar an tam hle tih sawiin, over weight lo tura training nasa zawk pe turin police hotute chu beisei an ni tih a sawi.

Home Minister-in a sawi chhuah ngai hial khawpa police zingah taksa invawng lo an tam ta hi police hotute tan chuan mualphona a tling. Police-te chu midangte ṭan­puitu tur, mipuite venghima a ṭul anga ral pawh bei thei tura ngaih an ni a, discipline ṭha tak hnuaiah invawng takin an taksa pawh an enkawl tura ngaih a ni.

Tuna Mizorama police tam tak hi chu an invawng lo a ni satliah lo a, an inthlahdah em em a, inthlahdah theia an awm hi an discipline ṭhat tawk loh vang a ni. Tun hma chuan police-te hi zinga an exercise late hmuh tur an awm ṭhin a, taksa insawizawina leh inthununna an ngai pawimawh ṭhin a, tunah chuan chutiang hmuh tur chu a vang ta hle.

Police ni si dulkiar, armed police mi leh sa ni si operation neih dawn pawha chhawr tlak mang lohte an awm ta nuk a, police ṭhenkhat phei chu ruihhlo ngai an ni ta hial. Police zingah discipline leh fitness nei ṭha tak tak awm bawk mah se, Mizoram police inrelbawlna pumpui hian dis­cipline leh fitness lam hi a hlat tawlh tawlh palh ang tih a hlauhawm a, Home Minister thusawi hi darthlalangah hmang rawh se.

Police hotu tinin hei hi chonaah ngai se, mahni thuneihna hnuaia an enkawlte ṭheuh fitness ṭha zawk nei turin discipline khauh zawk hnuaiah enkawl se, Mizoram Police ṭha tak kan neihte hi ṭha lehzuala chhuah tum ṭheuh rawh se.