Ration card aṭanga inpaih thu

Tunlai hian Mizoram leh Tripura inrìna laia awm Phuldungsei khuaa mi 85-te Mizoram ration card aṭanga paih chungchangin sawi a hlawh hle a; eptu party mite chuan Mizoram ration card aṭanga paih luiah sorkar an puh.

FCSCA Minister erawh chuan India ramah ration card pahnihah awm kawp theih a ni lo a, mi 85-te chu Mizoram leh Tripura-ah ration card an neih/awm kawp avangin paih an nih thu te, Mizoram ration card neih an duh zawk a nih chuan Tripura ration card an tihtawp phawt hnuah engtik lai pawhin Mizoram sorkarin ration card a siamsak theih thu te, chumi hma chuan manual-in ration card siamsak an nih dawh thute a sawi.

India ramah hian mi tu pawh ration card pahnihah awm kawp theih a ni lo a; ration card-a hming chuangte leh an Aadhaar thlun zawm a nih tawh avangin chutiang mite chu ration card khawi emaw zawk aṭangin paih an ni zel a, Mizoramah pawh mi eng emaw zat chu ration card pakhat zawk aṭangin paih an ni tawh.

Tun hma deuh chuan Mizoram ration card-a hming chuang zawng zawng belh khawm chu Mizorama mihring awm zat aia tam fê a lo ni tawh ṭhin a; ration card nei kawp leh card-a hming awm kawp tam tak an awm vang a ni. Hei hi thil zahthlak a nihna lai pawh a awm. Mahse, ration card chu Aadhaar nen thlun zawm a nih tâk avangin awm kawp an la awm a nih pawhin an tam tawh loin a rinawm.

Ration card chungchanga India ram kalphung leh awm kawp theih a nih loh dan hi mi pangngai chin chuan an hrethiamin a rinawm a, political party-a hruaitu ni phate phei chuan an hre chiang hle ang. Chuti chung chuan, Phuldungsei khuaa mi 85-te paih chungchang hi politics-a inbeih nan an hmang ta tho a; ram leh hnam tana thil ṭha leh dik a ni ang em, tih erawh ngaihtuah tham a ni.

Phuldungsei khuaa Mizote hian Mizoram ration card neih an duh zawk a nih chuan Tripura-a an ration card an tihtawptir phawt a ngaih avangin an bawhzui a ngai ve ang. Mizoram sorkar leh FCSCA department-a thawktute pawhin a remchan anga an puih pawh a ngai mai thei bawk a, inhawng takin bawhzui se a ṭha âwm e.