Chakma census

Central YMA-in Chakma chhiarpui neih a tum chung­changah Chakma pawl hrang hrangte chu National Human Rights Commission (NHRM) leh Ministry of Home Affairs (MHA)-ah an zualko a, NHRM leh MHA-te chuan Mizoram sorkar chu insawifiah turin a hriattir.

Mizo mipui nawlpuiin pawm harsa an tih chu Mizoram chhunga Chakma pung chak lutuk hi a ni a, dan pangngaia inthlahpun dan piah lam thil a awm niin a lang. Hei vang hian Chakma zingah ram pawn aṭanga dan loa rawn pêm lut hi mi tam tak awm awm ngei niin a lang a, hei hi Mizo mipuite'n a him loa an hriat chu a ni.

Central YMA chuan thil awm dan a thlir a, tun ang zela Chakmate an pung chak a nih chuan nakinah harsatna lian tham a la thlen palh an hlau a, chuvangin Chakma mipuite hriat chian theih dan zawngin engzat nge an nih chhiar an tum niin a lang. CYMA lam hian Chakmate tihṭhaih emaw, tihbuai emaw, an tana harsatna siam an tumin a lang lo a, tun dinhmunah Chakma engzat chiah nge awm tih an hre chiang duh niin a lang.

Hetihlai hian Chakma lamin NRHM leh MHA lamah an hêk ta si a, thuneitu sang zawkin Mizoram sorkar thil awm dan sawifiah tura an rawn zawt pawh hi thil mak a ni lo. CYMA hian ṭhahnemngai takin, ram leh hnam humhalh duh vangin Chakma census hi neih an tum a; nimahsela a kalpui dan a fuh loh hi chuan thil ṭha tak pawh hi a puitling thei lo ṭhin. Tuna Chakma mipuite tan bik chhiarpui neih tum pawh hi a lo dawngsawngtu lamin an dawnsawn fuh loh a, thuneitu sang zawka thiam taka an hêk chuan dan kalha che-ah hial an puh lo ang tih pawh a sawi theih loh.

Kan thil tih tur­ah hian fimkhur thiam ila, kan ṭha­hnemngaihna hi rilru fima kan kalpui loh chuan tute'n emaw a ni lo zawngin min hêkna remchangah an hmang leh ṭhin. Engpawhnise Mizo mipuite hian Mizorama Chakma pung chak lutuk hi mak an ti a, dan loa pem lut an ni nge ni lo tih zawn chhuaha finfiah hi chu an duh hle a ni.