Zalenna i vawng nung zel ang u

Vawiin hi India-in British awpna aṭanga zalenna a hmuh champha a ni a, India ram pumah ropui taka lawm a ni dawn. India ram ropui takah zalên tak leh ralmuang taka Independence Day vawi 78-na kan thleng leh thei hi a lawmawm.

Ram zalên nih te, khua leh tuite'n zalên taka an duh anga nun an hman theihna ram nih hi a hlu tak zet. Vietnam zalenna atana nasa taka beitu Ho chi Minh chuan uar takin, "Zalenna aia hlu a awm lo," a ti hial a ni.

Zalenna awm lohna leh ram zalên loah chuan a chhunga cheng mipuite khuahkhirh an ni a; duh angin nun an hmang thei lo a, an duh zawng apiang an sawi chhuah vek a rem lo a, mipui nun a chêp ṭhin. Mizoram pawhin 'rambuai' kan lo tawng tawh a, khatih hun laia Mizoram a zalen lohzia leh Mizo mipui nun chêpziate rualú zawkte chuan an la hre chiang hlein a rinawm a; zalenna hlutzia an hre chiang lehzual âwm e.

India ramah kan awm a, mipuiin rorel tura an duh zawng an thlan theihna ram a ni. Ram hruaitu tura kan thlante'n dik taka ro an rel loh chuan kan paih thei a, a ṭha tur nia kan hriat mi dang kan thlang thei. Hei ringawt pawh hi a hlu em em tawh. Duh záwng sawi theihna zalenna mipuiin kan nei a, roreltu ni mekte pawh mipui vantlang hriatah kan sawisel bawrh bawrh theih a ni.

India ramin zalenna a hmuh theihna tura theihtawp lo chhuahtu te, ram zalenna atana nun a hial hlântute an ropui tak zet a, ngaihsan leh chawimawi an phû em em. Zalenna kan neih theihna tura nasa taka beitute leh nunna hial hlântute kha khua leh tuite hian kan zah tur a ni a, kan phâk tâwkin kan chawimawi ve tur pawh a ni.

George Bernard Shaw chuan, "Zalenna tih awmzia chu mawhphurhna a ni," a ti a; zalenna hian mawhphurhna a keng tel a, khua leh tuite'n zalenna vawng nung turin ti ve tur kan nei tihna a ni. Zalenna hi hman sual theih a ni a, thil dik lo leh ṭha lo te, ram leh hnam tana pawi thei thil tihna remchang atante hman theih a ni a; chutiang chu ni lo tura fimkhur leh invên reng a ngai.

India zalenna champhaah hian ram mipuite'n zalenna hlutzia ngaihtuahin hre thar leh ila; zalenna kan neih hlu tak hi vawng nung zel ila, a tichhe thei zawnga hmalakna leh chêtna reng reng chu i dodal tlat zel ang u.