Hnam dang laka rilru zau put

National Institutional Ranking Framework (NIRF)-in India rama zirna-in sangte ṭhat dan a tehna NIRF Rankings 2024 chu August 12, 2024 khan a tichhuak a; Pachhunga University College chu India rama college ṭha 35-na a ni a, Mizoram University chu university ṭha 77-na a ni.

PUC India rama college sang tél zinga college ṭha 35-na a ni thei leh MZU pawh university ṭha 77-na a ni thei hi a ropui tak zet. NIRF Ranking ang chuan PUC chu hmarchhak biala college ṭha ber a ni a, MZU pawh hmarchhak biala a ṭha ber pathum zinga pakhat a ni a; India rama college leh university ṭha nia hriat ṭhin tam tak aiin an dinhmun a sang tawh zawk. Hetiang dinhmun an thleng thei hi thuneitu te, thawktute leh zirlaite ṭhahnemngaihna leh thawhrimna vang a ni ngeiin a rinawm a, an fakawm hle.

MZU leh PUC-te hi India rama zirna in ṭha zinga mi an ni tawh a, zirlai lut tur thlan danah Common University Entrance Test (CUET) hman a ni tawh bawk nen, Mizoram páwn aṭangin zirlai pawh an ṭhannem tial tial niin a lang a, an la pun belh zel pawhin a rinawm.

An dinhmun sang tak avangin PUC leh MZU-ah hian Mizoram páwn lam mi, hnam dang zirlai an la pun belh zel theih avangin an hotute leh thawktute mai bakah, Mizo mipui hian rilru zau tak kan neih tial tial a ṭul ang. Rilru zím, hnam dang ngaihtheih lohna rilru pu mai loin, heng institution-te dinhmun hi kan hriatthiampui a la ngai fo âwm e.

Mizorama zirlai pawlte hi an ṭangkai ṭhin a, thil ṭha tam tak an lo ti tawh a; thil dik lo dodal chungchangah phei chuan mi tam tak hmachhuan an ni ṭhin. Chutihrualin, hnam dang chungchangah hian an thîkthu a chhe hma deuh ṭhin niin a lang a, a ṭhatna a awm ang a; chuti chung chuan, zirlai pawlte leh mipui hian hnam dangte pawm thiamna leh ṭhiana siam duhna rilru kan neih chhoh a ngai tulh tulh dawn.

Mizote'n kawng hrang hrangin hma kan sawn zel a, zirna mai bakah, thil hrang hrangah hnam dante nen kan la inchiahpiah tial tial dawn. Mizorama zirna in ṭhaa hnam dang lut mekte leh lut thar duhte chungchangah pawh rilru zau zawk an put telh telh a ngai chho dawn a ni.