Zirlaite leh ram hruaitu zah
Sorkarin zirlaite scholarship a pek chhuah kim loh vanga lungawi loh lantir nan Mizo Students’ Union (MSU) general headquarters huaihawtin tun hnai khan Aizawlah zirlaite'n kawng an zawh a; scholarship an duh thu an aupui piah lamah Mizoram chief minister Lal Thanhawla chu deusawh takin an au khum.
Zirlaite hian an chanvo ni ngeia an ngaih scholarship an chang kim lo chu an hrethiam lo a, Mizoram sorkarin 10% a pek ve tur a pe kim lo chu a rang thei ang bera dawn an phût. He mi kawngah hian sorkar pawhin thuchhuah siamin an pek ngei tur thu an tichiang tawh a, chief minister pawhin pek an nih tur thu a sawi a; nimahsela sorkar hruaitu thu ṭheuh ṭheuh a inan hlawm loh avangin zirlaite hian kawng an zawh ta tho a ni.
Kawngzawh ni hian a kima scholarship dawn phûtna au hla mai duhtawk loin chief minister chu mawi lo takin an au khum a, political party kawngzawh pawhin an hman zen zen loh ṭawngkam mawi lo takte an hmang hial a, a pawi hle a ni. Chief minister hian a hma lawkin Aizawl City College Joint Students' Union General Conference-ah "Scholarship vanga lehkha zir in ni lo. Puitling tur leh ei leh bara intodelh tura zir in ni," a lo ti tawh a, hei vanga chief minister hi ṭawngkam na taka tâwng lêt pawh an ni mahna.
Zirlaite hian thil phût an nei a, chu chu scholarship a kima hmuh a ni. Chief minister hian zirlaite'n scholarship a kima an hmuh tur thu a sawi tawh a, sorkar pawhin thuchhuah a siam tawh. Hemi hnua mimal taka chief minister bei zui a, ṭawngkam chhe tak hmanga zirlaite an au rual hi a zialo hle a, a hma kum lawka mipuite thlan tlin mahni chief minister pawh zah nachang hre lo leh aia upa zahna tlachham ang maiah zirlaite an chhuak ang tih a hlauhawm hle.
Tun hma pawhin zirlai pawl hian lungawi lohna an lantir fo tawh a, tharuma an lantir changte pawh a awm a; nimahsela ram hruaitute zahawmna hre lo ang maia ṭawngkam chhe zawk an hmang hi Mizo hnam kal zelnaah a fuh lo a, thinrim sosan vanglai hi insum kan mamawh hunlai a ni tih zirlaite hian an hriat a ṭha hle a ni.