Tuihna humhalh leh lo neih

Former Legislators Asso­ciation of Mizoram (FLAM) chuan tun hnai khan ‘Water Con­servation’ tih thupui hmangin seminar an buatsaih a; PHE minister Zodintluanga'n a hman­pui. He hun hmanpuitu PHE minister Zodintluanga chuan, Mizoram chhung hmun tam takah tuihna a kang chah nasat tawh thu a sawi.

Mizorama tuihna humhalh ṭul tawhzia hi helam hre chiang deuhte hian an sawi ṭhin a, mipui nawlpuiin kan hriat phawt loh chuan tuihna humhalh hna hi a sawt thei dawn lo. Tuihna a kang chah chhan hi chu ramngaw kan ṭhiah nasat vang a ni ber a, ṭul loa ram kan tihkan avangin kan ramah tuihna a tlem zel a, mihring kan pun zel si avangin tui lama harsatna hi kan la tawk dawn chauh lo ang tih a sawi theih loh.

Hemi kawngah hian Mizo mipui pumpui hi kan harhthar a ngai a, tun anga kan kal zel chuan kan ramah tui a vâng tawlh tawlh ang. Kan lo neih dan hi kan thlak a ṭul tawh takzet a, a thlak dan tur hi mithiamte'n an zawh chhuah a hun tawh. Khawvelah tlang ram tam tak a awm a, tlang rama awmte hian lo hal ve kher loin an ei khawp an thar chhuak thei a, Mizorama cheng kan nih vanga lo hal kher loa kan awm hleithei lo hi chu kan inennawn a hun tawh khawp mai.

Thingtlang lama kuthnathawka ei­zawngtute hian anmahni mai chuan tlang ram lo neih thlakna hi an zawng hmu thiam dawn lo a, hetiang kawngah tak hian mithiamte an pawimawh. Mizoram sorkarah pawh agrigulture, horticulture leh a kaih­hnawih danga mithiam ṭha­hnem tak kan nei tawh a, hengte hian thil kal dan pangngai zawm mai lo hian, Mizoram tan ṭha zawk tura lo neih dan hi an zir chhuah a, mipuite an zirtir a hun tawh hle a ni.