Zu khapna dan siam rem

Independence Day 2024 lawmnaah Chief Minister chuan Mizorama zu khap dan, Mizoram Liquor (Prohibition) Act, 2019 chu tihdanglam hret tum a nih thu a sawi a, "Kan thlai thar aṭanga hlâwkna tam zawk kan hmuh theih nan MLP Act, 2019 leh a kaihhnawih dan kan hman mek chu siam danglam hret tum mek a ni," a ti.

Sorkarin MLP Act siam danglam hret a tum dan tak hriat chian a la ni lo. Chief Minister-in a sawi dan aṭang hi chuan 'zu' (liquor) khapna hlih tumna emaw, thlahdul hret tumna emaw niin a lang lo a; kut hnathawktute thlai/thei thar aṭanga zu (wine) siam a nih theihna tura dan her rem hret a kâwk zawk niin a ngaih theih.

Mizorama kut hnathawktute'n thlai leh thei chi hrang hrang an chíng a, an thar ṭhin bawk a; chu'ng thlai/thei ṭhenkhat chu wine siam theihna a ni. Thlai/thei a nihna ang anga hralhna kawngah harsatna an tâwk fo a, hralhna a tam tâwk lo fo. Chuvang chuan an thar chhuah ṭhenkhatte aṭanga wine siam duhna a lian viau ṭhin a; chu chu an kut hnathawhin hlâwkna ṭha zawk a neih theihna tur pawh a ni âwm e.

MLP Act avang hian thlai leh thai hmanga wine siamah harsatna a awm ṭhina sawi a ni a; thlai leh thei hralhna lamah harsatna neuh neuh a awm ṭhin bawk nen, kut hnathawktute'n an thawh hah phu tâwk hlâwkna an hmu lo fo. Kut hnathawktute an hlâwk zawkna tura an thlai leh thei hmanga wine siam theih dan kawng zawnpui a ṭul a; chumi tur chuan dan siamrem hret a ngai a nih pawhin thil tih âwm tak a ni.

Zu khapna dan siamrem hret tum hi dodal ngawt chi a ni lo mai thei a, ngun taka ngaihtuahna sênna tur a ni ang. Kut hnathawktute hlâwk zawkna tur a nih chuan hriatthiamna thui tak neih a ngaiin a rinawm. Mimal, pawl leh kohhrante pawhin an hriatthiam a ṭul mai thei e.

Mizorama thar thei/thlai hmanga wine siam chho zel a nih pawhin, mihring tana hrisel tur ngaihtuah a ṭul ang a; mihring hriselna atana him lo tura siam a ngai ang.