HIV/AIDS donaah ṭanrual a ngai

Mizoram Maxi Cab Owners Association (MMCOA) chuan, HIV natna kai (PLHIV) ten inenkawlna damdawi lam tura an zinnaah maxicab chuan man a zatve (50%) chiah lâk an rem ti.

Mizoramah hian HIV positive hi a ni telin an pung zel si a, heng mite hi kan chênpui kumkhua tawh tur an ni. A chenpui kan thiam lo a nih chuan a tuartu chu Mizo mipuite bawk kan ni dawn a, chung zingah chuan a vanduai bik HIV positive-te tawrhna a nasa zual dawn tihna a ni ang.

Tunah MMCOA chuan PLHIV-te tan lirthei chuan man a zatve tihhniam an phalsak a, an entawntlak hle mai. Mi vanduaite tawrhna hriatthiampui a, an tana nihlawhna tur an siamsak thiam hle mai a, midangte pawhin entawn thei se a ṭha hle mai.

Mizoramin HIV/AIDS kan hriat hmasak dan a fuh loh avangin mi vanduaite kai ṭhin hi misual leh awm khawlo deuhte chauh kai turah kan dah a, heng mite kan en dan pawh a dik tawk lo hle. Tun hnaiah thawktu lam an ṭang a, mipui hnenah HIV/AIDS nihna dik tak an sawi lang a, a hlauhawm dan lam ringawt ni loin a hlauhawm loh dante thlengin zirtirna an kalpui ta a, thil lawmawm tak a ni.

Mizorama kan Mizopui, vanduai­thlak taka HIV positive-te tan hian Mizo mipuiin ṭhat kan chhuah a ngai a, MMCOA-in ke an pen tawh a, pawl dangin kan zui a, Mizo mipui nawlpui kan harh chhuah a hun tawh takzet a ni.