Kan hawi zau a ngai

India rama South Korea am­bassador, Joongyu Lee chu tun hnaiah Mizoramah a lo zin a, sorkar mi pawimawhte nen an inkawm. South Korea ambassador kawmtu Environment & Forest minister Lalrinmawia Ralte chuan, nakin zelah Mizo ṭhalaite'n Korea thiamna leh theihnate an chawr ṭangkai theih dan tur kawng dap an tum thu a sawi.

Mizoram hian hmasawn a duh a nih chuan, India sorkar aṭanga sum a hmuh ringawt hi innghahna atan a hmang thei lo a, mahnia thawh­chhuah a ngai. Mi­zo­ram chhungah sum ṭhahnem tham thawhchhuah a harsa a, chuvangin a pui thei tur midang sawm luh thiam a, khawvel zau zawk nena inlaichianna siam tuma ṭan lak hi a pawimawh hle a ni.

India ram state ṭhenkhat hi ram pawn (foreign) puihna leh thlawpna vanga hmasawn tak tak sawi tur an awm a, anni chuan sorkar laipui ringawt an ngaihtuah lo a, chumi piah lam thil chu an thlir phak a ni. Mizoram hruaitute hian kan ram siamṭhaa tihmasawn turin sorkar laipui aṭanga kan budget hmuh hi a tawk lo tih an pawm ngam a ngai a, ṭanpuitu tur an dap thiam a, thawhpui tur an zawn zau deuh a hun tawh khawp mai.

Tun hnaiah India rama South Korea ambassador a lo zin a, thil lawm­awm tak a ni. Ani chauh lo pawh India ramah hian ram hrang hrang aiawh mi pawimawh ṭha­hnem tak an awm a, heng mite hi biak pawh tum a, an hnen aṭanga hlawkna awm theite kan zawn thiam a hun tawh hle.

Mizoram kaihruai tura thlan tlin ram hruaitute hian tun ang reng hian Mizoram hi dah lo se, tum neiin ram kalpui se, chumi atana ṭanpuitu leh thawhpui tur zawn kawngahte ṭan la zel rawh se, an khawhawi tizau deuh deuh rawh se.