Chhiah leh a petu
Chief minister Lal Thanhawla chuan, Mizoram sorkarin mumal taka kal turin kum tin cheng vbc. 5000-6000 vel a mamawh tih sawiin, "Chhiah lamah ram tan thâ kan thawh ve a ngai a ni," a ti a; state dang nena khaikhin chuan Mizote hi chhiah pe tlem ber zinga mi kan ni," a ti a; chhiah tihsan chu mipuite pawhin an hriatthiam a beisei thu a sawi.
Tun hnaia Mizorama chanchin nei lian tak chu sorkarin kawng hrang hranga chhiah a la khawm hi a ni. Sorkarin sum leh paiah harsatna an tawh mek avangin sum tam zawk lakluh theih dan a ngaihtuah a, chhiah a tipung nasa hle. Sorkar lam chuan sum leh pai dinhmun siam ṭhat a, ramin awmze neia ke a pen theihna turin mipui hnen aṭanga kawng hrang hranga pawisa khawn khawm hi a ṭul niin an sawi.
Mizo mipui nawlpui hi chuan sorkar hi thil min petu tur angin an en a, a thlawna dawnna tur angin an hmu tlat a, chhiah pek hi an hreh hle. Mi tam tak chu nei reng chunga chhiah pek hreh ngawih ngawih an ni a, mi ṭhenkhat ve thung chu pek tur pawh nei mang lo khawpa rethei an ni. Political party-te hian inthlana tlin an duh luatah sorkar sum harsat dan tur an hriatreng chu an hre lo der a, sorkar hnathawk hlawh sang zawk an tiam a, sorkar behchhana sum sem an tiam a, hei hi tunah ramin a tuar mek a ni.
Khawvel ram dangte leh India rama state ṭhenkhatah chuan mipuiin chhiah pek hi nâ an ti vak lo a, a chhan chu an chhiah pek kal zel danah an chiang a, thil ṭangkai taka hman lêt a nih dan a hmu thei. Mizoramah erawh chuan mipui nawlpui hian sorkar leh sorkar hnathawkahte hian rinna an nghat ngam lo a, sorkar kut a thlen tawh chuan dik mang lo turah an ngai emaw tih mai tur a ni.
Mizoram sorkarin chhiah a khawn a, a petu tur mipui lam hian loh theih loha ngaiin hreh tak chungin an pe a, chhiah petute hian an pek khawmna sorkarah hian rinna an nghat thui lo hle niin a lang. Chief minister-in chhiah lamah ram tan thâ kan thawh ve a ngaih thu a sawi a, mipui sum thawh khawm hi dik tak leh ṭangkai taka hman ni se, sorkar official pamhamte leh political party worker-te insem tur mai mai ni suh se. Mipuiin phal taka chhiah an pek theih nana pawimawh chu sorkar rintlak, mipuiin an rin ngam sorkar neih hi a ni e.