Sawhthing tâm leh sorkar hmalakna

Kut hnathawktute'n sawhthing kg. khat Rs 50 aia tlêm loa an hralh theih nan Mizoram sorkarin hmalak a tiam a, Mizoram hmun hrang hrangah kut hnathawktute'n sawhthing an ching nasa a, khaw 263-ah chhungkua 25,102-in sawhthing an chíng nia hriat a ni. Kut hnathawktute hian beiseina sang tak an nei tih a lang.

Chutih laiin, tun dinhmunah chhungkaw 6,586-te sawhthing chu a tám ta tlat mai a, sawhthing chíngtu zat aṭangin 26.24% lai an tling a; an khawngaihthlak tak zet.

Kut hnathawktute sawhthing tám chu tihdam a nih theih nan leh a la tám lote vênna turin Mizoram sorkar Horticulture department chuan August 16, 2024 aṭang khan sawhthing tám beihpui thlâkna 'Operation Ginger 2024 - Fehchhuah Runpui' a kalpui ṭan a; Horticulture department-a mithiam eng emaw zat chu an feh chhuak mek a ni.

Sorkarin Operation Ginger an kalpui hi a lawmawm a, kut hnathawktute'n beiseina sang tak nen an thlir a, an nghak a ni. Department-a mithiamte'n kut hnathawktute duhsakna leh hmangaihna nen, an harsatna tawh aṭanga chhan chhuak turin theihtawp chhuah se; an chungah Zoram mipuiin beiseina sang tak an nei si a.

Horticulture Minister-in, "Operation Ginger hian sawhthing chíngtu harsatna tâwkte ṭanpui turin Horticulture department thawktute an awm reng dawn tih a entir a, loneitute pui turin department thawktu a tê ber aṭanga minister thlengin kan inpeih reng," a ti a. Minister thusawi hi a lawmawm a, sawhthing chíngtute tan thâwk huaina tham a ni ang. Minister hian a sawi tawh ang takin hma la zui zel se, department mite pawh ṭang sauh sauh zel se.

Mithiamte'n theihtawp an chhuah chung hian kut hnathawktute'n harsatna an tawh mek hi a ziaawm thei mai lo a ni thei a, sawhthing a tám zual zel zawk pawh a ni thei. Chutiang chu a ni palh ta a nih pawhin kut hnathawktute rilru natna belhchhah tura politics-a inbei chiam chiam lo tura mipui kan fimkhur a ṭhain a rinawm. Mizoram sorkar pawh sawhthing chíngtute tawrhna tiziaawm turin eng kawng emawa a inbuatsaih a ṭul awm e.