Mizoram Gorkha-te leh OBC

Mizorama Gorkha-te'n Other Backwarded Class (OBC) dinhmuna an awm phalsak turin Mizoram sorkar an ngen thar leh a; hei vang hian Gorkha-te hnena OBC nihna pek leh pek lohin tunlai hian sawi a hlawh a, Mizo zingah OBC pek phalsak ṭha ti leh ti lo tam tak an awm ve vein a lang.

Mizorama Gorkha-te hnena OBC nihna pek phalsak hi Central YMA chuan an duh loh thu an puang a, a hnu lawkah NGO Coordination Committee-in an duh loh thu an puang ve leh bawk. NGOCC hian August 17, 2024 khan an ngaihdante MJA Gen.Hqrs hruaitute an hrilhfiah a, journalist-te ngaihdan an ngaithla bawk.

NGOCC-in Gorkha-te hnena OBC pek an duh loh chhan ber chu, OBC an nih avangin Mizoram sorkar hnuaiah quota (reservation) nei nghal dawn lo mah se, OBC awmna state dang sorkarah reservation an neih hlawm avangin Mizoram sorkarah reservation an dil leh ang a, state sorkarin a pek loh theih loh hun a la awm an rin vang a ni.

Gorkha-te OBC nihna pek chungchanga NGOCC ngaihdan leh rin dan hi thil âwm tak a ni a; tun aṭanga fimkhur lâwk a ṭha rêng a ni. Thil dang dangah pawh Mizo ram leh hnam tana ṭha lo thei thilah chuan fimkhur leh invên lâwk a ṭul em em.

Gorkhali-te hian OBC nih an dilnaah, an duh chu sorkar laipuia OBC reservation awm chu neih ve an duh thu leh Mizoram state sorkarah quota an beisei tel dawn lo tih an intiam nghala sawi a ni. Chuti a nih chuan, miin Mizoram sorkarah reservation an beisei dawn loh thu leh an dil dawn loh thu an tiam chunga 'An la dil ang' tihsak luih tlat pawh a fuh ber lo ve thei bawk. State sorkarah reservation an dil lo ang tih sawi theih a ni lo ang bawkin, an dil ang tih pawh sawi theih a ni lo.

Engpawhnise, Gorkha-te hnena OBC nihna pek phalsak hi Mizoram tan a ṭha lo zawk a ni thei a, thil hrang hrang ngaihtuahin a fuh zawk thei bawk. Mizoram sorkar leh tlawmngai pawlte hian thutlukna dik siam turin rilru fim tak leh uluk taka an ngaihtuah zui zel a ṭha ang. Ram leh hnam humhalh duhna thinlung nei reng chunga rilru leh ngaihtuahna zau zawk neih pawh a ṭul awm e.