Hnam dang kawp

Calcutta Mizo Welfare Association (CMWA) leh Kolkata Mizo Students' (KMS)-te chuan resolution siamin, Kolkata khawpuia Mizo nula awm, hnam dang mipa kawpa Mizo hnam timualpho thei zawnga che ṭhinte chungchangah ṭha an tih anga hma an lak tur thu an puang.

State pawna Mizo awmten harsatna inang an tawh chu Mizo hmeichhia hnam dang kawp chingte hi an ni a, heng zinga tam zawk hi chuan hnam timualpho chiin hnam dang mipate an kawp ṭhin niin a lang. Mizo hnam timualpho thei zawng leh, hnam dangin Mizo hmeichhe dangte an hmuhsit phah theihna tur khawpa Mizo nulate'n hnam dang an kawp hreh lo ṭhin hi a pawi a, a zahthlak takzet a ni.

Hnam dang nupui pasala neih hi chu inkhap leh indan theih a ni lo a, miin a mimal zalenna hmanga a kawppui tur a thlan chu eng hnam pawh ni se pawlin lo khap theih a ni lo. Hetianga ṭha taka innei tur ni lem lo, hnam dang tute'n emaw Mizote an hmuhsit zui theihna tur chia hnam dang kawp chingte hi state pawn Mizote'n an ngaih theih loh chu a ni a, a pawi hle a ni.

Nu leh pa an ṭan thar a ngai a, Zoram pawn khawpuia lehkhazir leh hna­thawka mahni fa dahte'n an fate chin an hriat a ngai. An fate awm dan dik tak hriat chian tumin bei se, anmahni leh hnam tana ṭha lo takin hnam dang mipate nen an inkawp nge kawp lo tihte an finfiah ngam a ṭha khawp mai.

Hnam dang nena inneih hi inkhap theih a ni lo a, thil tih chi pawh a ni lo ang; nimahsela hnam dangte nena mawi lo taka inkawp a, Mizo hnam timualpho zawnga khawsate chu a ṭul anga zilhhau a, kawng dik kawhhmuh ngei a ṭha ang.