Nagaland-ah i inzir ang u

March 5 khan Dimapur, Nagaland-a Naga hmeichhe pakhat pawngsualtua puh hnam dang pakhat chu mipui pungkhawmin a tânna jail aṭanga la chhuakin ruaka kawng an zawhpui hnuah an chil hlum. He thil thleng hi India ram mai bakah khawvel hmun dangah pawh sawi a hlawh hle a, Union Home Minister Rajnath Singh chuan Nagaland Chief Minister TR Zeliang chu Dimapur-a dan leh thupek dinhmun siamṭha turin a hriattir.

Nagaland-a mipui thinrim chet dan hi a demawm a, he thil thleng avang hian Nagaland hi a hmingchhia a, Nagaland sorkar a mualpho a, sokar hnathawk ṭhenkhat hrem an ni tawh a, pawikhawihtua puh pawh eng emaw zat man an ni tawh. Nagaland-a thil thleng hi mipui pungkhawm thil tih a ni a, an thinrim em avangin hetiang hian an che ta mai niin a lang.

Mizoramah pawh hetiang thil hi a thleng ve palh thei tih inhre chunga kan inven lawk a ṭha hle mai. Tun hnaiah Mizoram khawpui ber Aizawlah pawh pawikhawihtu man an nih hnu thlenga, "An hmel kan hmu duh," tia police station bula punkhawmte kan la ching a, venhimna nei ṭha lo zawk leh venghimtu nei tam lo zawk khaw danga police station-te phei chu hetiang lakah hian a him lo hle a ni.

Dan hnuaia awm kan ni a, misual tu pawh man a nih tawh hnu chuan danin a chungchang a ngaihtuah mai tur a ni a, dan hmanga hrem tur a ni. Dan awm sa ring zo lo leh duhkhawp loa mahni kuta dan kenkawh a nih tawh chuan buaina lian zawkin a umzui nghal zel a, dan kenkawh tura ruat ni lo mipuiin mahnia thuneihna inpe chawpa hremna lekkawh nghal an tum chuan a buai zo ṭhin.

Tun hnaia Naga­land-a thil thleng pawh hi mipui pung­khawm thinrim thil­tih a ni a, an inveng zo ta lo niin a lang. Hetiang thil hi Mizoramah a thlen ve lohna turin inzirna atan hmang ila, khawtlang hruaitute'n mipui kuta thuneihna a luh pawi theihzia zir chhuahna atan hmang se, police lam pawhin inbuatsaih uluk a ṭulzia hriat chhuahna atan hmang se, ṭhenawm state-a mipui thinrim chetna hi harh chhuah nan i hmang hlauh ang u.