Kolasib district-a kawngpui chhia

Kolasib district-a lirthei pawl palite chuan an district chhunga national highway chhe lutuk avangin Kolasib district chhung bikah August 22, 2024 chawhma dar 10 aṭangin tiam chin awm loin NH kawngpuiah lirthei tlân lo turin mi tin an chah. Kawngpui chhe lutuk thawm ṭha thuai tura mawhphurtute an nawrna hmanrua a ni.

Lirthei neitu pawlte hian an thuchhuak zâwm loa lirtheia tlân lui an awm chuan, an chungah eng pawh thleng se, an cho chhuaha an ngaih tur thu an puang. NH kawngpui an dan tur thu sawi lo mah se, mipui an hriattirna thu enin, NH kawngpuiah lirtheia tlân luite chu dan an tum ang pawhin a ngaih theih âwm e.

Vairengte leh Sairang inkar NH kawngpui hi hmun tam takah lirthei tana tlân harsa khawpin a chhia a, Bairabi-a rêl chawlhhmun aṭanga buhfai phurh chhuahna ber kawngpui pawh a chhe em em bawk a; chu'ng kawng chhiate chu a thlalak (still photo leh video) social media-ah a darh nasa hle.

NH kawngpui hi NHIDCL enkawl a ni a, an hnuaiah contractor/company-te'n kawng siam hna an thawk ṭhin. Vairengte leh Sairang inkar kawngpui hi siam zawh hlimah mâm ṭha ve pur mah se, a ṭha rei lo ṭhin a; kawng siamtute'n an siam dan a ṭhat tâwk loh vang a nih a rinawm.

Hmun ṭhenkhatah phei chuan kawng chhiate chu a chhiatna a rei tawh hle a; sorkar lama thuneitute'n chak taka siam turin a siamtute hrilh ṭhin mah se, awmzia a nei thui lo ṭhin. Kawng enkawltu leh siamtute an luhlul hle niin a lang a, sorkar thuneitute'n na zawk leh vau hial pawha an nawr a ngai niin a lang.

Kolasib district hi Mizoram châk lakna kawngpui pawimawh, Mizoram mamawh zawng zawng deuh thawh lak luhna a ni. Lirthei pawlte'n Kolasib district chhungah lirthei tlân an phal lo a nih chuan a nghawng a na dawn a, Mizoram mipuiin an tuar ngei ang.

Chuvangin, harsatna awm loa lirthei an tlân thuai theih nan NHIDCL leh an hnuaia contractor-te'n kawngpui chhe zual laite an thawm ṭhat thuai thuai a ṭul a, an tihmâkmawh a ni. Sorkar thuneitute pawhin na lehzuala an nawr a ngai bawk. Mipui náwlpuiin an tawrh hma ngeia hmalak a ngai e.