Vairengte mipui an fakawm

Tun hnaiah Assam lamin an police-te leh mipui chakna hmangin Mizoram chhung hmun ṭhenkhatah buaina an siam a, Vairengte daia police duty-te ngei pawh tihbuai tumin lungin an vawm a, Vairengte mipui ṭangrualin heng Assam mite hi an nawr kir a, thui tak thlengin an nawr lêt a ni. 

Vairengte hi Assam aṭanga kawng­­puia kal zela Mi­zo­rama khaw hmasa ber an ni a, hei vang hian tun ṭumah mai pawh ni lo ramri chungchang leh hnam thilah vawi duai lo an lo thawk chhuak tawh ṭhin. Tuna an chet dan leh ram humhim tura huaisen taka ke an penna hian Mizoram tan rah ṭha tak a chhuah ngei a rinawm a, Vairengte khawtlang hi an chhuanawm hle a ni. 

Vairengte hian Assam mipui­te an nawr hian thil tam tak an chân tih hi mipui nawlpui hi chuan kan hriatthiampui phak lo mai thei; an taksaa tawrh an huam bakah sum leh pai pawh hloh inhuamin ram tán an pen chhuak a ni. 

Ramri khuate hi chu state pawna mite nen sumdawnna thila inzawm tlat an ni a, Lailapur nena buai­na a chhuah hian Vairengte chhungkaw eng emaw zat eizawn­na hi na takin a nghawng tel nghal dâwn a ni. Chutiang zawng zawng hre lawk chuan, ram tana tawrh leh chân inhuamin Vairengte mipui hian ram chhani ke an pen a, Mizo mipuite hian hei hi kan hriatpui a ṭha khawp mai. Mizoram tana Vairengte khaw mipuite chet dan hi Mizo history-ah chhinchhiah a ni reng tawh dâwn a, ram leh hnam tana tawrh leh hloh inhuam chunga huaisen taka an chetna hian rah ṭha pawh a chhuah ngei i beisei tlat ang u.