Mahni hna tur thawha lawmman pek

PHE minister Zodintluanga leh Mizoram Consumer Union (MCU) hruaitute chu tun hnaiah an inkawm a, rualkhai zawka tui sem a nih theihna tur ruahmanna an sawiho a, tui semtu ṭha thlan an rel.

Aizawl khawpuiah tui sem dan ruahmanna thar hman a ni a, tun hma aiin tui a hnianghnar ta a, mi tam takin tui an lei ṭhin chu lei ngai loin an awm ta. Hetihlai hian tui meter vuah fel tawk lo a tam a, tui bill sang lutuk avangin sawiselna a tam a, mipui tan phurrit a ni a, hei hi MCU leh PHE minister hian a chinfel dan an dap dawn niin a lang.

MCU leh PHE minister-te meuh an inhmuhkhawmnaa tui semtu ṭha lawmman pek an rel hian tui semtute pawimawhzia a tilang a, chutih rualin tui semtute hi lawmman pek ngai khawp an lo ni ta tih pawh a tichiang hle. Tui semtu hna ber chu ṭha taka a hun taka tui sem a ni a, tumah duhsak bik nei loa a rualkhai thei ang bera tui sem mai chu a hna leh a eizawnna a ni. Tunah erawh tui semtu ṭha thlan duhna hial a lo piang ta a, hei hian tui semtu zingah thawk ṭha lo tam tak an awm a ni tih chiang takin a tilang.

Tui semtu ṭha lawmman pek hi thil ṭha tak a ni mai thei a; nimahsela hei hian PHE depart­ment chhunga inenkawlna a fel tawk lohzia a hailang a, a changtu minister tan ṭan leh zualna tur a ni ang. Sorkarin sum tam tak sengin tui lakna tur a bun a, engineer-te'n tui a haw theihna turin an thawk a, a hmawr bawknaa awm tui semte'n mipui hnena an sem ṭhat leh ṭhat loh mai maia kan tui hmuh dan a innghat a nih chuan PHE chhungkuaah an inrelbawlna an en­nawn leh a ṭha hial ang.

Engpawhnise tui sem ṭhate hnena lawmman pek hian nghawng ṭha a neih chuan rawtna ṭangkai tak a ni dawn a, tu pawhin sawisel, invau leh inhrem aiin lawmman dawngtu nih kan duh ṭheuh a; tui semtute pawh lawmman dawn tumin ṭha takin hna thawk se, mipuite pawhin an phû ang ngeiin tui hnianghnar zawkin an dawn theih i beisei phawt ang.