Huaisen taka zirtirtu sem rual

Education minister Dr Vanlalthlana chuan August 19, 2024-a ZPM pisaa thu sawiah, zirtirtu sem rual an tum a, huai taka an kalpui dawn thu te, thingtlanga rei tak awm tawhte leh khawpuia awm rei tawhte sawn chhuah a ngaih thute a sawi.

Minister sawi ang hian, thingtlanga zirtirtu hun rei tak awm tawh leh Aizawla hun rei tak awm tawh mi eng emaw zat an awm a, an tam viau pawh a ni thei. Aizawla sorkar sikulah zirtirtu an tam tlangpui a, zirlai erawh an tam lo tlangpui thung.

Thingtlang lamah erawh mimal/kohhran sikul ṭha pan tur a tam loh avangin sorkar sikulah zirlai an ṭhahnem tlangpui a, zirtirtu an tlem em em thung. Zirtirtu pahnih/khat lekin zirlai eng emaw zat an enkawl sikul pawh a awm nual nia sawi a ni ṭhin.

Education Minister-in huaisen takin zirtirtu an sem rual dawn thu a sawi hi a lawmawm a, sawiah tawp mai loin, thil tihin zui ngei se. Sawi ringawta tihhlawhtlin leh si loh ang chi hi kan lo hre fo tawh a, mipuiin an ning tawh.

Zirtirtu sem rual hi thil hautak leh harsa tak a nihna chin pawh a awmin a rinawm a, fimkhur a ngai viau bawk ang. A bik takin khawpuia awmte sawn chhuak turin tuang tihchhah a ngai zualin a rinawm. Education Minister ho hian department official-te'n fimkhur leh uluk takin, chak tak siin enfiahin zir chiang se, zirtirtu sem rual an tum, vantlang hriata Minister-in a sawi tawh hi tipuitling ngei rawh se.

Kan politician-te'n zirtirtute hi voter thlira an thlir fo avangin zirtirtu sem rual ṭha an tih leh an duh reng pawh an tipuitling ngam lo ṭhin. Mi tlemtê hlauh vangin mipui náwlpui duh dan leh ṭha tih hi tihhlawhtlin a ni lo leh ṭhin. Tlâk hlauh vanga thil ṭha, ram leh hnam tana hmsawnna zawk tur pawh tih ngam loh ang hi chu tawp tawh se mipuiin an duh em em a; tun sorkarah hian beiseina sang tak an nei a ni.