BOCWWB-a inziah luh tam a ngai

Tun hnai mai, August 20-21 chhunga Assembly session-ah Labour, Employment, Skill Development and Entrepreneurship (LESDE) Minister-in Building and Other Constructions Workers Welfare Board (BOCWWB)-a inziak lut mi 17,704 an awm mek thu a sawi. MLA dangin BOCWWB-ah cess tling khawm cheng vbc. 80 vel a awm nia a hriat thu a sawi bawk.

Chinchang hre zawkte sawi danin, Mizoram contract leh a kaihhnawih thil hrang hranga hna thawhna tur sum ruahman zat aṭanga 1% chu labour cess atan BOCWWB-ah chhûn luh a ngai a, an chhûng lut ṭhin bawk a. Tunah hian sum tling khawm a ṭhahnem tawh hlea sawi a ni.

Sum tling khawm chu hmanna tur leh hman theihna chin a awm a, chuvang chuan thil ṭha leh ṭangkai tur pawh ni se, hmanna tura tih ni loah chuan hman ngawt theih a ni lo. Sum tling khawm tawhte chu Board-a inziak lut tawhte'n an hmang sêng lo hle niin a lang a; chuvang chuan, inziak lut an tam a ngai a ni.

Welfare Board-ah inziak lut an tam theih nan nasa taka hmalak an tum thu LESDE Minister-in a sawi hi a lawmawm a; online-a registration kalpui te, district leh constituency hrang hranga membership drive neih te, multimedia campaign neih tum a nih thu a sawite hi chak taka bawhzuia tihhlawhtlin ni se.

BOCWWB-ah inziak lut an tam theih nan hmanrua leh remchang awm thei ang ang hman thiam a ṭulin a rinawm. VC/LC-te leh tlawmngai pawlte pawh an ṭangkai viau thei a, thuneitute hian hmang thiam se a hlâwk viauin a rinawm a; inziak lut an pun phah ngei ang.

BOCWWB hi kut hnathawktu, in sakna leh construction work tih huang chhunga hna thawktute hamṭhatna tura din a ni a, cess lutte pawh anmahni leh an chhung te, an nupui fanaute tana dah a ni.

Hna thawktute tana sorkarin hamṭhatna a siam hi chhawr turin BOCWWB-a inziak lut theite chu inziak lut vek se a duhawm. Inziak lut an tam theih nan sorkar mai bakah, khawtlang hruaitute leh pawl hruaitute pawhin ṭan la thei se, an huam chhunga mite an finchhuah a, ṭan an lo lak ve a ṭul a ni.