Medical reimbursement leh Mizoram

Health minister Lal Thanzara chuan, pharmacist-te chu medical reimbursement (MR) bill dik lo hai chhuah kawngah huaisen taka kal turin a fuih a, harsatna an tawh chuan an hnunga din a intiam a, "MR bill dik lo in hmuhchhuah hian Mizoram sum tam tak luangral tur min humsak a ni," a ti.

Mizoram sorkarin sum a neih loh avangin harsatna a tawk mek a, hetihlai hian medical reim­bursement lamah sum tam tak a seng reng thung. Medical reimbursement hi thil ṭul a ni a, sorkarin a mipuite tana pe tur pawh a ni a; nimahsela medical reimbursement dik lo tam tak a awm ṭhin a, sum siamna rem­changa hmang an awm ṭhin.

Tun hnaia medical reim­bursement lama Mizoram sorkar sum sen tamzia en hian ṭan lak thar a ngai hle tih a chiang a, medical reimbursement dik leh dik lo viltu tur a hranpaa indin pawh a ṭha hial mai thei. Sorkar hian mi thiam bik, medical reimbursement hrang hrangte vil tur leh endik tur pawh indah hial se a la hlawk zawk theiin a rinawm a, tun hnaia Mizoram chhung leh Mizoram pawna medical reimbursement kan pek dan hi chhui chian a ngai a ni.

Mizoram sorkar-a bill leh tur a nih hre rengin phai lama damdawi-in ṭhenkhatte pawhin uchuak takin bill an siam a, damlo an en danah pawh a ṭul lo thlengin an en emaw tih mai turte a awm. Mizoram chhungah pawh sorkara bill leh thei damlo an nih chuan an enkawl dan hi a dang deuha a lan châng a awm a, hengte hi mi thiam zawkte ruaiin huaisen taka endik ngam a ṭha hle.

Sorkarin sum renchem dan tur kawng hrang hrang a dap a, chumi kawnga ṭangkai thei tak pakhat chu medical reimbursement kalphung endik tur mi thiam dah hi a ni ngei ang. Health minister pawhin hei hi bawhzui thei se, a tidik lote hrem piah lamah a dik loa bill an siam hmaa hai chhuah hi a finthlak hle a ni.