PMJVK-ah guidelines anga kal ni se

August 20-21, 2024 chhunga Legislative Assembly session-ah Pradhan Mantri Jan Vikas Karyakram (PMJVK) hnuaia hmalakna leh hnathawhin sawi a hlawh a, House chhung boruak a ṭanna ber niin a lang.

PMJVK-ah hian guidelines ang chuan zirna (education) leh hriselna (health) lam ngaih pawimawh tur a ni a, heng thil chi hnih atan hian project hmuh zawng zawng aṭanga 80% vel lai hman tur a nia sawi a ni. Chu chu state dang tam zawkin an hmanna pawh a ni.

Mizoramah erawh chuan hun hmasa lamah khan zirna leh hriselna lamah PMJVK aṭanga sum hmuhte hman a ni lo a, a tam ber chu infiamna (sports) lamah hman a ni daih mai. Chief Minister phei chuan 100% sports-ah a kal thu leh district committee kaltlang loa thil tih a tam thu a sawi hial. Hei hi thil mak a nih rualin, a mak lohna laite pawh a awm thei ang.

Infiamna hmunhma tihchangtlun hi a ṭha a, chhawr ṭangkaitu pawh eng emaw zat an awm. Mahse, a aia pawimawh zawk, mipui náwlpui chhawr ṭangkai theih zawk tur thil a tam mai a; chuvang chuan hun hmasa lama PMJVK hnuaia hmalaknate kha Mizoram mipui duhthusam a ni lo.

District Council & Minority Affairs Minister sawi danin, kum 2023-24 chhunga sorkar thar pian hnuah PMJVK hnuaiah hian sorkar laipuiah project 65 thehluh a ni tawh a, sum hmuh erawh a la awm lo thung.

Mizoram sorkarin PMJVK project sorkar laipuia a thehluh leh tawhte hi eng lam hawi nge tih mi náwlpuiin an hre lo a; guidelines ang deuhin hriselna leh zirna lam kaihhnawih project a ni hlawm em tih hriat a ni rih lo. Hun lo la kal leh zel turah chuan guidelines sawi ang takin zirna leh hriselna lam ngaih pawimawh zel tawh ni se.

PMJVK guidelines-in a ngaih pawimawh - zirna leh hriselna lam hi mipui náwlpui, chhungkaw tin nghawng a ni a, a pawimawh em em. PMJVK hnuaiah kher lo pawh thil pawimawh bik a ni. Chuvangin, guidelines-in a sawi ang takin PMJVK hnuaia hmalaknate hi kal thei se, mipui náwlpuiin an chhawr ṭangkai theih dan ber tur a ni ngei ang.