H1N1 (Swine Flu) leh Mizoram

Tunlaiin India ram hmun hrang hrangah H1N1 (Swine Flu) vanga thi an tam hle a, Mizoramah pawh H1N1 vei an awm tawh niin thuneitu lamin an puang a, thihpui erawh an la awm lo.

Tun hnaiah damdawi-in pakhatah hmun dang aṭanga lo zin hnam dang pakhat chu Swine Flu ni ngeia rinin a na a, finfiah a nih hma aṭangin Swine Flu a nih thu hi a darh nasa hle. Hei mai hi a ni lo a, a awmna damdawi-ina damlo dang ṭhen­khat-te pawh an mangan phah a, thu­thang chi hrang hrang a tam hman hle.

Swine Flu hi nat­na hlauhawm tak, thihpui theih a ni a, kan hlau tur a ni. Hetihlai hian mipui nawlpui tana tawngpawng hlauh vak chi a ni lo a, hri ṭhenkhat anga mipui nawlpuia vawi lehkhata thleng thut thei a ni lo tih kan inzirtir tam a ngai. A kai theih dante leh a hlauhawm dante kan inzirtir rual hian, a hlauhawm loh theih dante leh a inven dan te, tihdam theih a nihziate thlenga inzirtir uar a ṭul hle ang.

Mipui nawlpui hi chuan thil awmzia hi kan hrethiam mai ṭhin lo a, hlauh tur hlauh nachang hre lote kan ni a, hlauh loh tur hlau tlatte pawh kan awm ṭhin. Hei vang hian mithiamte'n tun aia uar zawka Swine Flu chungchang zirtirna an pek darh a, ṭan an lâk a pawimawh takzet a ni.

TV leh chanchinbu lama sum senga sor­karin mipui zirtirna a pek chhuah ṭhin piah lamah, tunlai thiam­na hmang ṭang­kaia Facebook, Whatsapp leh thil dang­ah sum seng kher lo pawhin Swine Flu inzirtirna hi thehdarh theih a ni a, sorkar leh he mi kawnga mawhphurtute'n theihtawp chhuah­in mipui hi hrilhfiah zel se a ṭha hle a ni.