MZU kawngpui

Mizoram University Road Joint YMA Committee hruaitute chuan tun hnai khan UD&PA minister an hmu a, Vaivakawn-MZU kawng la siam zawh loh km. 1.8-a thui thawh chhunzawm turin an ngen. Minister chuan siam chhunzawm a nih tur thu a lo hrilh a, sum awm lo chunga Chief Minister ngenna ngaih pawimawh vanga siam chhun­zawm a nih tur thu a sawi.

MZU Road Joint YMA Committee-ah hian Luangmual, Zonuam, Chawlh­hmun, Tuivamit, Tanhril Vengthar, Central Jail Veng leh Sakawrtuichhun-te an tel a, heng vengte hian hun rei tak chhung chu kawngpui ṭha duhin ṭan an lo la tawh ṭhin. MZU kawngpui hi siam a nih hma aṭang tawhin thawm a nei a, siam a nih hnu thlengin harsatna a awm a, tunah pawh siam zawh lohlaite a la awm zel avangin mipuiin harsatna an tawk rei ta hle.

Mizorama thil mak tak chu hna kal laklawh zawh fel a nih hmaa sum harsatna vanga buaina awm fo ṭhin hi a ni. Sorkarin sum a neih loh vanglaia thleng mai a ni lo a, tun hma aṭang tawhin dan ang thlapa hnathawh tura tihfel vek tawh, hna bul ṭan a nih hnuah zawh a nih hmain harsatna eng eng emaw a awm fo mai. Hna lian thamah a awm nasa zual a, pawisa tam zawk hmuh belh beisei vanga contractor lamte'n thiam taka an kalpui a nih chuan a demawm a, sor­karin hnathawhna tur sum a hmu thei lo ṭhin a nih pawhin ngaihdam a harsa khawp ang.

MZU kawngpui pawimawhzia kan hre ṭheuh a, tun thlenga siam zawh a la ni lo hi mipui tan hriatthiam a harsa tawh hle ang. Harsatna thleng thei tam tak a awm teh meuh mai a, mipui lam erawh chuan harsatna awm thei hi an thlir duh tawh lo a, hun rei tak an lo nghah tawh kawngpui ṭha an neih hun chiah an rilruin a thlir tawh. Hei vang hian mipui duh ang ngei hian MZU kawngpui hi a rang thei ang berin zawh fel ni se, thu­neitu lamin ṭan han la thar teh se.