Phal lohna hmuna lirthei dah

Aizawl Municipal Council leh Aizawl Traffic police ṭang­kawp chuan nimin khan Rangvamual leh Ṭhuampuia AMC office inkar kawngpui sira truck ding an enfiah a, truck 42 an man.

Heng hmunte hi truck din khapna hmun a ni a, dan bawhchhia tam tak an awm ṭhin a, lirthei veivak tan harsatna siam tham an awm ṭhin a ni. Thuneitu lamin Aizawl khaw­pui luh dawna phal lohna hmuna truck ding hi tun aia khauh zawkin veng zel se a ṭha khawp mai.

Hetihlai hian khawpui chhunga lirthei din phal lohna hmuna dingte hi thuneitu lam hian uluk zawkin dap chhuak thei se a ṭha hle mai a, khawtlang hruaitute nen ṭangkawpin ṭan la zel thei se a duhawm. Aizawla veng ṭhenkhatin Local Council-te nen ṭang rualin an huam chhunga kawngpui sira zana lirthei riah an khap a, ṭan an lak nasat avangin veng tam takah chuan kawngpui sira lirthei riah ṭhin an awm ta lo.

Veng pakhatin an theih chu an ṭhenawm veng tan tih theih loh thu a awm lo a, dan anga lirthei dahna hmun nei veka inziak lut an nih tawh avangin kawngpuia lirthei riah hi chu man zel se a ṭha khawp mai. Mipui tana veivah a harsat piah lamah rikrum thilah chhanchhuaktute tana chêt harsa khawpui kawng sira lirthei riah hi a tam a, hengte hi Traffic Police, AMC leh Local Council lamte ṭang rual hian tihtawp dan ngaihtuah thei se a ṭha khawp mai.