AR hmun hman ṭangkai dan tur

Chief Minister chuan UDPA department-in August 22, 2024-a 'Aizawl Hmathlir' an buatsaiha thu a sawiah, Aizawla Assam Rifles battalion an chhuah hunah an chhuahsan ram hman dan turah zau zawka mipui leh pawlte ràwn ṭha a tih thu a sawi.

Aizawl Hmathlirah hian UDPA-in Aizawl khawpui tihhmasawn dan tur te, AR battalion an chhuahsan huna an hmun chhuahsan hman dan tur an duante an sawifiah bakah, sawiho a ni.

AR hmun chhuahsan hman ṭangkai dan turah mipui leh pawlte ràwn ṭha a tih thu Chief Minister-in a sawi hi thil âwm tak a ni. CM-in a sawi ang hian mumal taka inrâwn ni se, thil ṭha zawk a chhuah theih a rinawm.

UDPA department lamin AR chhuahsan hmun hman ṭangkai dan tur an lo ruahman lâwk pawh a ṭha viau. Mi zawng zawng ngaihdan leh duh dan inang thei lo karah, UDPA ruahmanna hi pawm-awm tak niin a lang a, a lawmawm.

Mizo mipui tam zawk chuan Aizawla AR battalion hi chhuahsan se, Zokhawsanga an hmun tharah insuan lut vek se an duh niin a lang a; chutih laiin, chhuak lo mahse pawiti lem lo eng emaw zat an awm ve tho bawk awm e. Mi ṭhenkhatin AR-te chhuak lo se an duh chhan hi - an hmun chhuahsante Mizo zinga thil ti thei deuhte'n anmahni tana an lo valh mai hlauhthawhna te, hmun ṭawp takah a chan mai hlauhthawnnate vang niin a lang.

Engpawhnise, AR hian Aizawl lailia an battalion hmunpui hi an lo chhuahsan ta a nih pawhin sorkara thil ti theite'n an hamṭhatna atan an hmang tur a ni lo a; mipui vantlang tana ṭha leh ṭangkai thei tur bera hman a ngai. AR hmun chhuahsan tur hi humhalhna tur bik dan hmanga sorkarin khauh taka a humhalh ngei a ṭul dawn a ni.

Chutih rualin, pawlte pawhin an pawl hamṭhatna atan leh an hmun atan hman tum lo ṭheuh se, an pawl chakna hmangin sorkar nawr lo bawk se a ṭha hle ang.