Grape leh eizawnna

Champhai district-a hlâwk zawk leh ṭha zawka kiwi leh grape chìn theih dan tur enfiah tura Mizorama rawn kal, Taiwan mithiamte chuan tun hnai khan Khuangphah leh Hnahlana kiwi leh grape chìnte an enfiah.

Taiwan aṭang hian Taipei Economic and Cultural Cen­tre asisstant repre­sentative Dr Hsu Hsin-Chiang, senior adviser Yih Show Chang leh asistant researcher (crop science) Dr Ming Te Lu-te an rawn kal a, anni hian a hmunah kal chilhin an harsatna tawhte an zawt a, thil awm dante an zir chiang a ni.

Mizoramah grape-a eizawngtu chhung­kaw ṭhahnem tak an awm a, grape tui sawr hmanga wine siamte pawh ṭhahnem tham tak hralh chhuah a ni. State pawn lamte nen inzawmna neiin rua­hmanna thui tak an nei tawh a, grape chingtute tan chanchin lawm­awm tak a awm chho zel a ni.

Hetihlai hian grape tui sawr zawrh chhuahte hi kan hman danah hian ruih tura ngaia zu ina in tam tak an awm a, heng mite hian grape wine an in chhan ber chu ruihna atan niin a lang. Tunah sorkarin MLPC Act hmangin khuahkhirhna hnuaiah zu a zuar ṭan ta a, hei hian grape wine sumdawnna hi a nghawng thei a, chuti a nih chuan grape chingtute eizawnna hi a khawih thei dawn a ni.

Sorkar lam hian thui tak thlirin ei­zawnna atana grape chingtute dinhmun hi ngun zawkin ngaih­tuah se, tuna a tih ang hian mithiante chah lutin hlawk zawka hralh chhuah tlaka sawngbawl zui dante pawh ngaihtuah se a ṭha khawp mai. Khawvel hmun hrang hrangah grape tui sawr hi eizawnna tling leh hlawk a ni a, chutiang taka Mizoram chhungah kalpui a nih theihna turin zirchian ngaite zirchian a, a ṭul chuan kan grape china thlak ngaite thlak a, hmathlir nei chunga ke pen a ṭul hle a ni.