Thu léngvâkah fimkhur a ṭul

Tun hnaiah Bawngkawnah Ramhlun South tlangval pakhat thia hmuh a ni a, police-in bawhzuiin, thihnaa inhnamhnawih theia ngaih mi pathum an man a, jail-ah dah luh an ni tawh.

Ramhlun South tlangval pakhat thih chungchangah hian social media hrang hrangah thu léngvâk a tam hle mai a, mi tam tak rilru a tiphâwklêk a, ṭul lem loah mi tam tak an buai phah a ni.

Social media-a thu thehdarhtu tam tak chuan police-te hmalak dan leh thlen chin an ngaihtuah lo a, ngaihtuah pawh an tum loin an duh ang angin thu an vaivir a, thu léngvâk eng eng emaw, rintlak lem loh thlengin an thehdarh niin a lang. Chu'ngte chu mipuite ngaihdan dik lo puttirtu a ni thei a, police-te hnathawh tibuaitu, harsatna siamtu pawh a ni thei hial âwm e.

Youtube lama thehdarhtute phei chuan entu (viewer) neih tam theih nan tiin, mawi leh mawi lo pawh thlu lo leh, dik leh dik lo pawh finfiah tum loin, thu lakna mumal leh rintlak neih pawh tum loin thil an ti mai niin a lang. Ramhlun South khawtlang hruaitute chuan, an veng tlangval thihna chungchangah social media leh thu léngvâk hrang hrangah fimkhur turin mipui an ngen hial a ni.

Tlangval pakhat thihna chungchanga social media hrang hranga thu thehdarhte zingah hian a dik lo a tam hle ang tih a rin theih. Chuvangin, social media-a thu thehdarh zinga ṭhenkhat chu mipuite'n rin loh ngam a ṭha a, en loh ngam leh ngaihthlak loh ngamte pawh a ṭul ang.

Social media-a 'content' siam ṭhinte pawh an fimkhur a ṭha a, mipuiah ngaihdan dik lo tuhtu an ni thei tih hria a, an thil hriat angte vawrh darh nghal zung zung lo tura an insûm a ṭul. Thu leh hla thehdarhtute hian mawhphurhna an nei tel a, chu mawhphurhna chu chhia leh ṭha hriatna hmanga an hlen chhuah ve a ngai a ni.