Kohhran leh hlemhlêtna do

Mizoram Synod chuan eirûkna do chungchanga hma la tur tualchhung kohhrante ngenna tun hnaiah a thawn chhuak. Baptist kohhran pawhin kumin May thla khan eirukna do chungchangah kohhran mite ngenna an tichhuak tawh bawk.

Mizoram Synod chuan, hlemhlêtnaa hminghliaute chu a theih chen chenah rawngbawlnaa hmang lo turin an kohhrante an chah a; kut tling loa sum lâk luh, sum thianghlim lo chu thawhlâwma thawh lo turin kohhran mipui a chah bawk. BCM pawhin eirûkna sum thawhlawma chhûn luh chu kohhranin a thlâkhlelh loh thu a tarlang a ni.

Mizorama kohhrante hian tun hma aṭang tawhin eirûkna leh hlemhlêtna an lo do tawh a, thuchhuah siam leh ngenna tihchhuah te, ṭawngṭai rualte a ni tlangpui. Hengte hi a ṭha em em a, eng kawngah emaw chuan awmzia a neih a rinawm.

Mahse, Mizoramah eirûkna leh hlemhlêtna a tàwp lo a, a bo lo; tàwp chu sawi loh, a tlahniam lo mai ni loin, a zual zel zawk emaw tih mai tur a ni. Mipui náwlpui mangang rûm thâwm pawh a ring tial tial a; eirûkna kohhranin a do dan pawh kohhran mipuiin an duhkhawp lo ṭhin niin a lang.

Eirûkna leh hlemhlêtnaa inhnamhnawih leh sum thianghlim lo la lut ṭhinte'n kohhran hi inphen nan an hmang ṭhin. Ṭhenawm khawvengte'n eiru nia an rin rawn pawh kohhranah chanvo langsar pek an ni fo a, tun thleng pawhin an la tamin a rinawm. Hengte avang hian mi tam takin kohhran an dem phah a ni.

Kohhrante hi eirukna do kawngah thawh hlâwk thei tak an ni a, tih tak takna nena an hmalaknain awmzia a nei thei hlein a rinawm. Hlem-hletnaa hming-hliaute rawng-bawlnaa hmang lo tura Synod-in ngenna a tichhuak hi a ṭha hle mai a; tualchhung kohhrante pawhin ṭha takin zâwm se, kohhran hi eirute leh mi hlemhlete'n inphenna leh lan mawina atan an hman kan remti tur a ni lo.

Corruption do kawngah kohhrante hian ṭan la sauh sauh se, Pathian chakna ringin kal zel se. Theihtawp an chhuah zel phawt chuan kan ramah hian corruption hi a rêm hun emaw, a tlakhniam viau hun a la thleng ngei ang.