Speaker bangla leh lirthei

Tun hnaia Assembly Speaker bangla atan chei ṭhatna atan cheng nuai 23.40 sên a ni tawh thu MNF party chuan RTI Act hmanga an zawhna chhanna tlawhchhanin press release an siam. RTI Act tlawhchhan vêka zawhna chhannaah Assembly Speaker hman tur lirthei (Mahindra XUV) leina atan Rs 28,97,631 hman a nih thu tarlan a ni bawk.

Chief Minister-in CM a nih hnua press conference a neih hmasak berah bangla chei nan sum hman vak an tum an tum loh thu a sawi laia Speaker Bangla cheina atana cheng nuai 23.40 hman a ni chu intuhâ lo an tih thu leh, chhetê tala mipui zah ve tura an phût thu MNF chuan an tarlang.

Thla 7/8 vel lek chhunga Assembly Speaker chenna bangla thawm ṭhatna leh lirthei a hman tur pakhat leina atan hian cheng 52.37 hman a ni tihna a ni a, a tam tham hle. Bangla chhunga hman tur sofa, dining table, doormat, etc. leina atana cheng nuai 15 lai sên a ni pawh hi a tam hle a ni.

Chief Minister lak luh nia press conference-ah khan CM chuan, speaker/minister/MLA-te banglate chu a luah mektute'n lungawi taka an luah laite a nih thu sawi a, "Furnishing tih hi ṭul kan ti lo, a awm ang ang hian kan chhawm ang," a ti. Inthlan hmaa an tih loh tur an sawiah pawh tarlan a ni. Chutih laia sum tam tak sênga Assembly Speaker bangla chei a ni hi thil inhmeh lo.

Speaker hmasain lirthei a hman lai pawh kum 5 emaw chauha upa a nih laia Speaker tharin cheng nuai 28 chuang sênga lirthei thar sorkar suma a lei pawh hi mi tam takin a uchuak hleah an ngai niin a lang. Lir thei hman lai a la thar ṭhat bakah, lirthei lei thar hi a to tak zet. Bangla chei leh lirthei thar man to tak lei hi mahni nawmsakna tur zawnna leh intih­ropuina a ang viau mai.

Sorkar khalh ngil turin eptu party-te an pawimawh. An thu leh hlate hi sorkar lai party tan ngaih pawimawh leh zawm vek theih a ni kher lo ang a, ṭhenkhat chu party inbeihnate pawh a ni ang. Mahse, Assembly Speaker bangla chei ṭhat leh lirthei man to tak lei chungchanga eptute ngaimawh hi a âwm viau mai a; eptute tih a nih avanga namnûl nghal mai lo a, inenfiahna atana thu tling tak a ni hriat a ṭha âwm e.