Bûkna leh tehna dik

Kolasib-a Legal Metrology hnathawkte leh Kolasib-a thuthar thehdahtute chuan, tun hnai khan khan Kolasib-a FCI kudama weighbridge an endik a, weighbridge chu a dik tih an finfiah.Truck driver-te chuan FCI kudam aṭanga buhfai an lakte chu Supply kudama an bûk leh pawhin an chawi belh ngai loh thu an sawi.

Mizorama kan buaina lian tak chu nitin mamawh thil kan leiin tehna a tling lo ṭhin hi a ni. Buhfai kan lei bûk a tling lo a, kan eirawngbawlna gas tihchingpen a ni a, kan petrol leh diesel-te pawhdal a nih piah lamah a hralh chhuahna hmun ṭhenkhatah an teh tling lo ṭhin nia sawi a awm a, heng thilte hi a vanduaithlak hle a ni.

Mipui hian a man a to deuh a nih pawhin mamawhna a san avangin hengte hi an lei lo thei ṭhin lo a, chutihlaia bûkna leh tehna dik lo an hmang ṭhin hi a pawi takzet a ni. Heng mite thil tih tuartu chu mipui an ni a, tute emaw hlawkna zawn avangin mipuiin an tuar ṭhin a, hei hi tihreh a hun ta.

Tun hnaiah Kolasib-a FCI-a buhfai bûkna chu a dik a ni tih an finfiah a, thil lawmawm tak a ni. Hetihlai hian bûkna hi chu dik sa tura ngaih a ni a, finfiah a ṭul tawh a nih chuan tun hmain a lo dik lo zeuh zeuh tawh emaw, hmun danga bûkna zingah pawh dik tawk lo a awm nia rinhlelhna a siam thei. Kan buhfai phurh luhte hi a
ṭhat leh chhiat chu thuhran ni se, a bûk takngial pawh a tling lo ṭhin a nih chuan thuneitu lam an chet a ngai.

Sorkar hian thil tam tak a ngaihtuah a, thil ṭha zawng zawng hi tih vek sen a ni lo ang; nimahsela mipui khawih bik thilah hi chuan tun aiin ṭang se, eirawngbawlna gas, buhfai, petrol leh diesel lakluhte hi tehna hrang hrang tlin leh dik a nih ngei theihna turin huaisenin taima se, hetiang ti thei hi mipuiin vote an chak ngei ang.