Sorkar hmalakna puanzar

Sorkar department hrang hranga media nodal officer-te chu tun hnai khan Information & Public Relations (IPR) minister hoin an ṭhukhawm a, sorkar hmalaknate zau zawka puanzar dan tur an ngaihtuah a; minister chuan department-te hnathawh leh hmalakna hrang hrangte mipuite hriat tura puanzara hrilhhriat chu sorkar bat a nih thu a sawi.

Tuna sorkar hna-thawh puanzar a nih dan hi ngun taka ngaihtuah chuan a kal khat hle mai a, sorkar thu leh hla puangzartute hian thuthar thehdarhtu pangngaite hna ang an thawk ve mai a ang ber. Tuna an kalphungah hi chuan I&PR lam mi leh sate hian VIP-te programme an zui a, an thusawite an puang chhawng a, VIP-te programme a kimchangin an tarlang bawk ṭhin.

Heng thilte ti reng chung hian I&PR department hian tun aia zau zawka hna an thawh a hun tawh hle mai a, sorkar hnathawh puanchhuah kawngah an ṭan a ngai. Sorkar hnathawh puanchhuah hi a roreltu political party-te fak mawina leh an tana hnathawh lam a ni lo a, sorkarin mipuite pawisa tur hmanga hna a thawhte hi mipuiin an hre ve tur a ni a, hei hi sorkar lam hnathawh dan puangzartute hian an hmaih lian hle a ni.

Sorkar depart-ment tinah hian an hnathawhte vantlang hriata puangzartu awm se, mipui pawhin fak phu an fak ang a, sawisel ngaite pawh an sawisel thei ang. Tunah hi chuan VIP-te programme, ni pawimawh bik thuchahte leh NLUP kaihhnawih lo hi chu sorkar hian thu a puangzar tlem hle a; sorkar hnathawh hrang hrangte hi ziakin emaw, a video-in emaw sorkar lam hian mipui hnenah puangzar ṭhin se a hlawk ngei ang.