MCSU thu hi

Mizoram Chakma Student's Union (MCSU) chuan Mizoram sorkar chu Gauhati High Court-ah an khing a, High Court chuan June 24, 2016 khan order tichhuakin, Mizoram (Selection of Candidates for Higher Technical Courses) Rules 2016-a Rule no. 5 chu hman theih loh turin a dah. Hei vang hian Mizoram sorkar quota-a medical course hrang hrang zir turte seat chan tur siam fel theih a la ni lo. Hetih lai hian, Central YMA chuan Chakma zirlai pawlte chu Gauhati High Court-a an PIL thehluh hnûkkîr turin an phût a, MZP pawhin MCSU-te thil tih hi an dem.

State Medical & Technical Entrance Examination (SMATEE)-a tlingte counselling neihpui an la nih loh avang hian MZP chu an lungawi lo a, Mizo zirlaite hmakhua tihbuai tumah Chakmate chu an puh a, "Mizo zirlaite tihbuai tum hrim hrima harsatna an siam hi kan hrethiam lo hle," an ti a; "Counselling kaltlang pui a nih loh a, zirlaite'n admission an ti thei lo a nih chuan Mizoram sorkar mawhphurhna a ni ang a, Chakmate vanga Mizo zirlaite'n admission an hmu lo a nih chuan Chakmate chunga eng pawh thleng se MZP-in mawh a phur lo ang," an ti zui bawk.

MCSU-te'n Gauhati High Court-a petition an thehluh avanga tuna zirlaite'n an zir zelna tura an seat an chân phah a nih chuan a pawi thui dawn hle mai a, MSCU pawhin MZP leh CYMA ngenna hi ngai pawimawh hram se, High Court-a an petition thehluh hi hnuk kir se a ṭha khawp mai. Chuti ni loa 'dan' tlawhchhana ram leilung fate tana harsatna siam zawnga an khawsa lui a nih ngat chuan thil ṭha lo zawk a hring chhuak palh ang tih a hlauhawm a, fimkhur a ṭul khawp mai.

Mi tinin mahni chanvo kan nei vek a, chumi chu chan ngei tumin kan bei tur a ni a; nimahsela tuna MCSU lamin an chanvo chang tura an beih danah hi chuan Mizo zirlaite tana harsatna siam thei zawngin ke an pen a, an thil tih hi a dik tawk lo a ni tih hriain inlamlet se, Mizo zirlaite hian an zir tur dik tak an zir ngei theihna turin chinfel ni thuai rawh se.