Lawngtlaia hnathawktu dan hi

Lawngtlai District Land Owners Association (LDLOA) chuan, Kaladan Multi Modal Transit Transport Project (KMMTTP) kawngpui siam meka ram laka zangnadawmna pek thuai phûta June 1, 2016 aṭang hna thawktute an dan chu tun thlengin an la chhunzawm zel.

Hmasawnna tur kawngpui siam hna tih-khaihlak a nih chhanah hian ram nei-tu lam hi chuan thiam an inti viau ang a, an ram an laksak hnu-ah ram man an la dawn loh avangin an lungawi lo a ni. Ram neitu dik tak ni si, an ram an laksak hnu pawha pawisa dawng lo an awm a nih chuan sorkarin a ngaih-tuahpui tur a ni a, hna-thawh tihkhaihlak phahna atan an hmang tur a ni lo ang.

Hetihlai hian LDLOA hnuaia ram neitu tamzia leh an ram neihna area zim dan ngaihtuah hi chuan, thil fel tawk lo a awm anga rinhlelhna a piang lo thei lo. Rampalailenga huan leh in hmun lo neih duah thei heti zat an han awm ringawtte hi thil mak a ni tawh a, zangnadawmna petu tur tan pawha an ram lak aṭanga teha pek chhuah huphurhawm tham an awm a nih chuan a buaithlak hle a ni.

Engpawhnise tuna mipuiin an duh ber chu he hma-sawnna hnathawh hi chak takin kal zel se, mipui hian kawngpui ṭha neih an mamawh a, chu chu an nghakhlel tawh a ni. Thuneitu lam pawhin zángnadawmna hi an pe chhuak thei dawn a nih chuan hnathawh tihṭhuanawp a nih zel lohna turin ṭan la se, he buaina hi chingfel thuai tawh se.

Thla khat aia rei kawngpui siam hna a chawl tawh a, a tawpkhawka tuartu chu mipui an ni leh ṭhin. Hei vang hian LDLOA pawh inngaih-tuah chiang se, thuneitu lam pawhin ṭan la se, hnathawh kal lai hi chhunzawm a nih theihna turin theihtawp chhuah tlang rawh se.