Ram hnuk khawih

Aizawl Municipal Cor-poration (AMC) chuan Aizawl khawpui chhunga free wifi buai-puitu tur thlanna atan tender chhuah a tum hnai a; MNF-in AMC inthlan dawna an lo intiam tawh ang ngeiin free wifi hi kumin chhung ngeiin AMC chuan peihfel an tum.

Mizoram khawpui ber Aizawlah municipal corporation a ding ta a, hma-sawnna tam tak thlen thei tura beisei a ni. Nimahsela AMC term hmasa ber kal dan a fuh tawk lo a, thuneih inchuh reng rengin an awm a, an inlal chhawk a, hmasawnna hna pawh an thawk
ṭha tawk lo. Mahni thuneihlai ṭheuhin hna an sem dan leh an kalpui danah induhsakna uchuak tak an lantir a, pawisa tam tham tak hmang ral siin AMC term hmasa ber hnathawh hmuh zui tur hi a awm meuh lo.

Tunah AMC term thar a lo thleng a, sorkar thar a piang a, sorkar inṭwm ni lo party mal sorkar a ni. AMC tlo zawk, AMC chak zawk leh AMC ṭha zawk mipuiin an beisei. Tun thlengin AMC hi mipuiin beiseinain an thlir a, an hnathawh tawh chin aṭanga teh an la ni lem lo a, an kal zel dan tur hi mipuiin an ngaichang ṭhup a ni ber mai.

Tunlai mipuite lawm zawng tak, a bikin ṭhalaite duh em em wifi chu a thlawna pek chhuah an tum a, free wifi zone siam chu inthlan dawnin an intiam a, an intiam ang ngeia tih an tum hi a lawmawm hle.

AMC a nih miau avangin mipui beiseina a lian a, khawpui tana hma-sawnna lian-tham thlentu tura ngaih an ni. Tuna AMC nena kan sawi zawm lar tak pakhat free wifi-te hi chu thil chai vak ngai lo leh buaipui chiam tham a ni lo. Chutihlaiin AMC kan hmelhriat dan hi free wifi petu mai ni lo, hmasawnna ruhrel dintu leh tipuitlingtu ni chho zel se, khawpui kalphung mumal lo siam diktu leh rel feltu ni thei zel se a ṭha. Ram hnuk khawih thil an khawihah pawh mipuite hian AMC hi ngaihvenin venpui zel ila, AMC ṭha leh chak zawk kan nei thei ngei ang.